Corte Comun di Caribe Hulandes awe a dicta sentencia den e caso conoci como “Speeltuin”, den cual a condena Gabriel Martin como Padrastro y Risheila Frans como mama. A acusa ambos di asesinato di Eugene y Rishandroh. Den e prome sentencia e mama a haya 3 aña di prizon di cual 1 ta condicional, pues mester sinta 2 so. Den caso di Gabriel Martin, a conden’e na 15 aña di prizon y despues TBS, den un centro psikiatrico cera. E ultimo no a keda contento cu e sentencia y a apela.
Awe Corte Superior, di cual ta sinta tres Hues for di otro islanan den Reino Hulandes, despues di a evalua e caso completamente di nobo, a dicta nan sentencia awe. Aunke cu Ministerio Publico a mantene e mesun castigo pidi durante tratamento di e caso den Prome Instancia, esta 15 aña, toch e Huesnan a desvia awe. Nan ta haya cu e caso ta mas serio di locual Ministerio Publico mes ta imagina y e actitud di Gabriel Martin durante henter e tratamento di e caso tampoco no a yud’e, pues no por a sinti ningun sorto di remordimento ni duele pa su acto.
En bes di baha e castigo, e Huesnan awe a opta pa aumenta su castigo y his’e di 15 pa 18 aña di prizon y despues di esey mar’e na TBS obligatorio den un centro cera.
Kisas ta bon pa aclaria e parti aki, cu e chens ta hopi grandi cu Gabriel Martin lo no sali for di prizon nunca mas di su bida. E realidad ta cu e no ta 100% responsabel pa su acto debi na retonan mental. Dor di esey Hues a tene cuenta cu e realidad ey y a oblig’e na haya ayudo mental despues di sinta su castigo y te ora cu un Dokter determina cu e ta cla, loke ta casi imposibel, e ora numa e lo recobra su libertad. Hues a tene cuenta tambe cu na Aruba no tin un centro asina ainda, pues lo mester construi’e ainda den e siguiente 18 añanan.
Pa mas informacion, lesa e sentencia completo: HVS MARTIEN G.A.C. 6-5-2019
