Corsou: VISHON ta kompartí proseso pa yega na lista di kandidato

82

Konfiansa den un polítiko ta wòrdu determiná parsialmente pa medio di su integridat. Den kuadro di esaki VISHON a komprometé su mes na un aserkamentu nobo di polítika. Pa por hasi un evaluashon di integridat profundo di tur kandidato riba lista, VISHON a kontratá un kompania independiente ku ta eksperto riba e tereno aki.

“Tur Vishonario mester kana e trayekto di evaluashon di integridat pa por subi lista”, Miles Mercera ta bisa. E evaluashon aki ta enserá entre otro un investigashon di antesedentenan en relashon ku edukashon i karera profeshonal, lasonan polítiko òf otro i kasonan penal i finansiero. Solamente kandidatonan ku a risibí un evaluashon di integridat positivo por representá VISHON komo parlamentario, minister òf funshonario.

Banda di esaki, tur kandidato mester a pasa den un prosedimentu di selekshon i kolokashon ku un ‘komishon di lista’. E komishon aki a wòrdu formá dor di dos eksperto eksterno den polítika i lider di partido Miles Mercera. Banda di evaluashon di e ambishon polítiko, konosementu di maneho i envolvementu sosial di e kandidatonan, a evaluá te na ki midí nan ta pará tras di e prinsipionan i balornan núkleo di e partido. E evaluashon di integridat kombiná ku e resultadonan di e prosedimentu di selekshon i kolokashon ta determinante pa kolokashon i e posishon di e kandidato potensial riba lista.

Pa forma e lista, VISHON a apliká un sistemátika ku segun nan ta mas hustu pa loke ta trata e resultadonan di elekshon. Riba e lista di VISHON e kantidatonan ku berdaderamente lo tuma asiento den Parlamento, ta na kabes. Kandidatonan ku ta yega na remarke pa un posishon di Minister ta wòrdu posishoná abou konsientemente. Banda di esaki VISHON no ta ekskluí pa traha ku ‘Vakminister’.

“Na e momentonan aki nos mester di personanan ku ta eksperto riba nan tereno i ku ta komprondé kiko ta pasando riba diferente tereno di maneho i na boka di trabou. Esaki nan no tur biaha ta esnan ku ambishon polítiko, i pa e motibu aki hopi biaha no ke subi lista polítiko”, Miles ta aklará.

Miles ta indiká ku Kòrsou por konta ku un partido fuerte ku ta kla pa enfrentá tur reto. Bo voto pa VISHON ta garantia pa un mihó futuro pa nos pais.