E Epidemiologo Dr. Izzy Gerstenbluth di Corsou ta masha cauteloso riba e tema di habrimento di frontera cu paisnan infecta ainda. E ta haya cu Aruba, pero den esey Sint Maarten tambe, ta expone nos mes na risico grandi door di habri frontera cu Merca otro siman caba. El a sigura cu Corsou no ta den posicion pa core un riesgo asina grandi y como tal lo no habri frontera cu Merca pa awo, por lo menos no tanten cu e pais ta den tanto reto pa cu e virus Covid-19.
Dr. Izzy Gerstenbluth ta conseha Conseho di Minister di Corsou directamente riba e tema aki, debi na su estudio y conocemento riba e materia di epidemiologia. Na Aruba nos no tin un specialista asina y como tal ta uza consehonan di Departamento di Salud Publico, y den esaki Sharline Koolman ta representa DVG den e team di maneho di crisis di Gobierno y cu na nan turno ta conseha Gobierno riba e tema complica aki.
Manera ta conoci, mescos cu Aruba, nos isla ruman Corsou tambe lo habri su fronteranan dia 1 di juli proximo. Corsou a opta pa habri frontera cu paisnan di poco riesgo te esunnan cu riesgo mediano. Esunnan cu hopi riesgo nan no lo habri por lo pronto. Segun Corsou, paisnan cu poco riesgo di contagio na e momentonan aki ta Aruba, Boneiro, St. Eustatius, Saba y St. Maarten. Paisnan cu tin un riesgo mediano ta Belgica, Canada, China, Alemania, Francia, Hulanda, Italia y Spaña.
Epidemiologo dr. Izzy Gerstenbluth a bisa awe mainta cu por lo pronto Corsou lo no habri frontera pa turistanan for di Merca. “Merca ta un riesgo grandi. Europa tambe ta cera su frontera pa Mericanonan. Sint Maarten lo habri frontera pa turista di Merca mañan mientras cu Aruba riba dia di 10 di juli. Cu esaki nan ta tuma un riesgo. Mi ta compronde nan, pasobra Aruba y Sint Maarten ta depende hopi mas di turistanan for di Merca cu Corsou. Pero e ta keda un riesgo. Corsou no ta tuma e riesgo ey”, asina e specialista a bisa awe mainta.
Aki na Aruba, Minister Dangui Oduber a splica cu te ainda ta haciendo tur preparacion pa habri frontera cu Merca desde dia 10 di juli proximo. E no ta exclui cu si presenta casonan abrupto y for di control den e dianan aki, cu lo por cambia e fecha di apertura. Te na e momentonan aki no ta mira necesidad pa tuma tal decision. Te cu awe, Aruba a conoce 103 caso positivo di Covid-19, 3 morto y nos tin 2 caso activo ainda. Corsou tabatin solamente 23 caso positivo, 1 morto y 19 pashent cu a cura bek. Nan tin mas turismo for di Europa compara cu Aruba cu ta practicamente “biba” di e mercado Mericano. Un “shutdown” atrobe di e mercado aki lo ta funesto pa nos economia!
