Corsou: Suzy Camelia-Römer (PIN) no ta duna bakoba, sino siña hende planta

230

Den su manera inovativo, djadumingu 17 di òktober Partido Inovashon Nashonal i su lider Suzy Camelia-Römer a lansa un programa pa kasnan di famia den bario ku solushon duradero: “Nò duna mi, siña mi”. PIN ku simia i planchinan di su aktivista i bisiñanan ta siña kasnan di famia den bario planta fruta i berdura den kurá di kas, sin mester gasta sèn na awa sin nodi.

Na 2018 ora ku e Minister di Salú, Medio Ambiente i Naturalesa, sra. Suzy Camelia-Römer, a lansa e programa Kunukito di Kas i di Bario, e intenshon tras di e programa a resoná mesora serka esnan ku den Buena Vista i despues Otrobanda, Montaña i Barber a partisipá na e programa. E programa pa siña algun shen hende produsí fruta i bèrdura den kurá di kas ta unu práktiko. Ta hasi mas tantu posibel di lokual tin kaba den kas i kurá (resiklá) ora ta planta. Tambe ta siña esun ku ta planta e diferente maneranan ku por prepará esakinan pa kome salú. Ku Kunukito di Kas i di Bario PIN i su minister Suzy Römer a sa di pone un fundeshi fuerte pa konsientisá henter pueblo di e balor di planta un simia awe pa nos tin kuminda mañan i na mes momentu kuida nos salú.

P’esei mi no a keda strañá ora ku durante e pandemia di Covid-19 hopi kas di famia a kuminsá apliká lokual nos a prediká: Ban planta den kura di kas i plenchinan den bario pa nos tin kuminda salú tur ora”, asina sra. Camelia-Römer a deklará durante di e akshon ayera na Mahuma. Pa PIN no tin nada mas mihó ku konsientisá, siña nos hendenan i duna nan un man pa nan por ta siudadanonan ku ta emansipá i por dal pasonan fuerte dilanti den bida. PIN no ta kere den e forma di hasi polítika ku ta parti pòrchòp, produktonan pa limpia kas òf kosnan di boka dushi of kualke material. Hende ta mihó sirbí ora bo duna nan un man pa nan por ta pará riba nan mes pia, sin mester humiá nan.

Parti di e mensahe di PIN na komunidat ta tambe, pa nò laga niun hende hinka den komunidat su kabes ku nos no por i ku ta otronan mester bin hasi kos pa nos. Kòrsou ta dotá di hendenan ku talento, abilidatnan úniko i konosementu. Nos konosé masha hopi ehèmpel di hendenan ku a destaká rònt mundu den praktikamente tur ramo: di deporte te músika i di siensia te arte kulinario. Awor aki ku pais ta pasando den vários krísis, ta e momentu pa nos pueblo uni ku tur e lokualnan nos tin komo bendishon di ariba pa sali dilanti.

PIN lo no spar ningun sodó pa laga e mensahenan aki yega na kas di tur famia. PIN den e dianan ku ta bin lo bishitá kasnan di famia den diferente bario na Kòrsou. Nò pa duna material, sino planta un sírkulo di abundansia (fruta i berdura) den kurá di kas, di moda ku pa fin di aña famianan ku mas mester por tin hopi kosecha na pa pasa bon ku famia i bisiñanan. Mirando e agogia di e programa for di ora esaki den senonan di PIN a bira konosí, ta spera ku lo tin mas petishon pa e e akshon aki  na kasnan di famia ku tin man pa por kumpli ku tur. P’esei PIN a hasi e aserkamentu aki unu struktural pa henter aña. Tur kas di famia ku ke un man pa planta den kurá por manda un e-mail na [email protected].

Pa entrevista, kontaktá Suzy Camelia-Römer na +5999.5106726