Corsou: Parlamentario Jeser El Ayoubi ku karta pa gobiernu riba Parkeo den sentro di siudat

Dirigi na Minister di Tráfiko, Transporte i Planifikashon Urbano Zita Jesus- Leito, MBA

Carta ta bisa lo siguiente:

Parkeo den sentro di siudat.

Apresiabel sra. Jesus-Leito,

Den señora Minister su afan pa ordená parkeo den sentro di siudat, hopi biaha ta sigui tradishon i den e kaso aki tambe a akudí na un destaho públiko pa asina yega na un of otro kompania pa manehá parkeo den sentro di siudat. E kompania ku tabata manehá e parkeo te ku awor tabata hasi esaki ku un meta komersial i pa sustituí e kompania aktual ku un otro ku e mes un meta komersial ta algu ku mester evaluá si e ta pas ku e desaroyo ku nos ta deseá pa Punda i Otrobanda.

Manera ta konosí tin komersiantenan i abitantenan den Punda i Otrobanda ku tambe tin un interes den un bon maneho di parkeo ku no ta unu komersial. Interes di e komersiantenan ta pa e parkeo ta ordená i trese entre otro mas aktividat pa nan negoshi i garantisá mantenshon di kuponan di trabou. Pa abitantenan ta di importansia ku den e maneho di parkeo nan ta keda ku e posibilidat pa por tin entre otro akseso fásil i relativamente lihé na nan bibienda.

Konsekuentemente organisashonnan den sentro di siudat manera Downtown Management Organization (DMO) i Sosiedat di Komersiantenan di Otrobanda (SKO) ta proponé pa nan manehá e parkeo di un forma moderno i ku e fondonan ku keda generá lo sirbi pa mantené un sistema di parkeo konfiabel i aksesibel , tambe ta krea e posibilidat pa atendé ku mantenshon di bañonan públiko, free wifi den sentro di siudat i mantenshon di mobilario di kaya den Punda i Otrobanda.

Na nos konsepto esaki ta netamente e tipo di maneho ku nos sentro di siudat mester kaminda partisipashon aktivo di tantu e komersiantenan komo e  personanan ku ta biba den nos sentro di siudat ta nesesario ku e meta pa garantisá ku Punda i Otrobanda ta keda bibu i ku bida. Tumando na kuenta e maneho i meta aki huntu ku e transparensia i kontrol nesesario no tin nesesidat di bai un destaho públiko den e kaso spesífiko aki. P’esei nos ke sugerí gobièrnu reevaluá e destaho enkuestion i eventualmente otroga esaki na e organisashonnan kaminda interes general i di esnan den sentro di siudat ta mihó sirbí.

Ademas mester tuma na konsiderashon ku mas i mas organisashonnan/ kompanianan priva ke partisipá den desaroyonan den diferente area di maneho di gobièrnunan rònt mundu, un asina yama Public Private Partnership (proyekto PPP) ta kuadra tambe de e maneho di nos gobièrnu pa asina logra kambionan positivo i visibel na bienestar di komunidat.

A base di e puntonan ariba menshoná i hasiendo uso di artikulo 96 di Reglamento di Orden di Parlamento nos ta dirigí e siguiente preguntanan na Minister:

  1. Minister por informá Parlamento si Minister Jesus-Leito ta dispuesto pa konsiderá di reevaluá e intenshon pa tene un destaho públiko i otorgá e kontrato na organisashonnan manera DMO i SKO?
  1. Minister ta dispuesto pa un biaha mas sinta na mesa ku e organisashonnan aki pa huntu yega na un maneho di parkeo konhunto ku ta sirbi interes general i di esnan ku ta biba, negoshá i laborá den sentro di siudat mas mihó posibel?
  1. Minister ta mira e posibilidat pa bini ku un PPP entre gobièrnu, DMO i SKO ku e meta pa garantisá ku e fondonan kolekta ta keda invertí den nos sentro di siudat teniendo na kuenta ku Willemstad ta forma parti di e World Heritage List di UNESCO?

Nos ta konta ku Minister lo tuma nos konsiderashonnan na serio mirando ku nos enfoke mester ta pa engrandese nos sentro di siudat tur di di nobo.