Despues di dos reunion fructifero pa atende e ‘aanschrijving mitigeren brandstofprijzen’ Parlamento ta aproba e ‘aanschrijving’ pa por trece un bahada n’e prijs di combustibel.
Normalmente pa algo manera esaki sosode, unda ta kita un di e schakelnan di belasting cu mester kobra riba gasolin, e mester sosode via di un ley.
Mirando cu esaki lo tuma mucho tempo, Gobierno di Corsou, den forma di Minister di Finansa, Javier Silvania, a propone un ‘aanschrijving’. Esaki ta encera cu den espera di e publicacion di e ley, minister di finansa por haci cambio na e prijs di combustibel.
Gasolin lo bay di 2.813 pa liter y lo bira 2.563. Esaki ta un bahada di 25 cen. Pa loke ta trata diesel esaki ta bay di 2.639 y lo bira 2.359 pa liter. Esaki ta un bahada di 28 cen.
Diamars 26 di april ultimo tabata e ultimo subida di prijs di combustibel. Akinan gasolin a subi cu 18 cen mientras cu diesel a subi cu 37 cen. E luna anterior pues luna di maart, tambe Corsou a conoce un subida di e prijs di combustibel unda gasolin y diesel tur dos tabatin un subida di 14 cen.
Mientras cu tur isla cu ta pertenece na Reino Hulandes ta baha prijs di gasolin, Aruba a cab’i conoce un di aumento drastico di diesel. E aumento di prijs aki ta pone cu diesel y gasolin ta riba e mesun prijs. Desde 11 di mei, gasoline unleaded-premium ta 289,0 cen pa liter pues un bahada di 2,0 cen y diesel ta 289,0 cen pa liter. Diesel a conoce un aumento di 14,5 cen.
