For di nos colega Aubrey Janga na Corsou, nos a ricibi un informacion hopi interesante. Den oranan di mainta, a bay haci un control na un supermercado riba caminda di Montaña, net na Hundenberg.
Ta e conocido Wah Sang Supermarket. E investigacion aki a cuminsa mirando cu tabata tin un container di alcohol cu a perde y a bin haya cierto informacionnan cu e alcohol cu a perde aki, lo ta den e supermercado.
Mesora a activa tanto Douane, Douane Recherche, e team multidisciplinario di MEO cu a yega y a haci un control rigoroso den Wah Sang. Mester bisa cu a bay patras y a haya dos camber cera na yabi. A puntra kico e cambernan aki ta y pa habri nan.
A bisa cu e cambernan aki ta cambernan cu tin placa warda den nan. A bisa cu tin cu habri nan. E Asiaticonan a bisa cu nan no por habri nan. Mesora a schakel in e team cu ta basha porta abao. Ora cu a mira cu ta bay basha porta abao, yabi a sali di biaha.
Ta trata di cambernan yena cu alcohol, for di vloer te na plafond, completamente yena. Casi e porta no por ni habri di tanto alcohol cu tabata tin eyden. Mesora a cuminsa cu un investigacion di e badge, cu ta papia di alcohol cu a keda perdi. Aparentemente un container di alcohol a keda perdi y a cuminsa bin dal riba cierto di e badgenan cu ta parti di e container cu a keda perdi. Mesora a sigui investigacion y a bin saca afo cu Wah Sang, no tin ningun permiso pa bende alcohol, esta slijtvergunning. Mesora a confisca tur alcohol cu tin den Wah Sang pa bay cun’e.
A pidi nan factura di unda a cumpra e alcohol, cual tampoco nan no tabata tin pa suministra. Esaki a pone cu nan a bay cu tur alcohol, pendiente nan bin presenta nan facturanan di e cantidad grandi di alcohol cu a constata aki, pa asina nan por recobra parti of e alcohol cu si tin factura di dje. Di e forma aki por mira cu e team di MEO, hunto cu e team Multidisciplinario y tambe Cuerpo di Duana, Douane Recherche a canta bingo na momento cu a bin haya un cantidad grandi di alcohol, cu ainda no sa for di unda nan ta bin.
