“Mi kier bisa cu como Gobierno di Aruba nos ta hopi preocupa y e tema aki nan tin nos ocupa constantemente”, asina Minister Presidente mr. Evelyn Wever-Croes a anuncia awe mainta durante un conferencia di prensa di Gobierno, para banda di Minister Dangui Oduber encarga cu maneho di Salubridad Publico, Turismo y Deporte. E ta referi na e tendencia cu tin mundo cabes abou, esta Coronavirus.
“Nos a eleva e nivel di preparacion pa cu Coronavirus, na un nivel di crisis den man di Gobierno. No pasobra cu tin caso registra caba, pero pa sigura cu nos ta prepara nos mes miho posibel y pa sigura cu tin fondonan cu ta bin disponibel, di e fondo di crisis, pa por atende cu e tema aki”, asina Prome Minister mr. Evelyn Wever-Croes a enfatisa. “E tema di Coronavirus no ta un cuestion cu si e ta bin Aruba, e ta bin Aruba, e lo bin Aruba, ta un cuestion di ki dia e ta bin y con bon nos ta prepara pe. Y pesey ta hopi importante pa nos tur keda cu cabes frieu y no bay den panico”, di acuerdo cu e Prome Mandatario di nos pais.
Gobierno di Aruba ta trahando riba tres diferente scenario caba. E prome ta e tema di salubridad. E di dos ta e tema di turismo, pasobra ta mira cu bishitantenan ta spanta pa biaha. Hunto cu ATA ta trahando riba un plan di contingencia pa si nota cu turismo ta bahando, cu lo actua mesora. E di tres tema ta aspectonan economico. Ta preocupa cu si turismo cay, e lo afecta nos economia hustamente na momento cu ta purbando di rebiba nos economia.
Diabierna ultimo, durante reunion di Conseho di Minister, e Minister Presidente a presenta un proposicion pa en bista di e Coronavirus, pa pone extra atencion na e inversionnan economico. Lo aplica un “Fast Trac Economic Stimulus package” pa ehecuta proyectonan economico lihe. Hopi hende ta kehando cu kier inverti pero burocracia di Gobierno ta stroba e desaroyonan aki debi na tardamento. Gobierno ta sinti cu awor no tin tempo pa perde, pa cual kier acelera tur e procesonan aki.
