Coronavirus: Hulanda a despacha ekipo medico y remedi pa Sint Maarten

Eindhoven, 5 april 2020 Beladen van medische hulpgoederen C-17 op Vliegbasis Eindhoven voor St Maarten

Desde Aeropuerto di Eindhoven a sali awe mainta un avion di carga, modelo C-17, pa Sint Maarten. E avion ta yena cu aparatonan medico, ekipo di proteccion y remedi pa atende pashentnan contagia cu Coronavirus. Mas bien e ta un hospital mobiel, un asina yama “Hospitainer”, den unda tin 6 espacio pa cuida pashentnan cu mester di “Intensive Care”. 

Separa di e container pa atende 6 pashent den ICU, Hulanda a manda aparatonan necesario pa maneha no menos cu 6 espacio adicional di ICU den e Hospital existente di Sint Maarten. 

Gobierno di Hulanda a informa cu e 12 espacionan adicional di Intensive Care ta disponibel pa pashentnan di tur e 6 islanan den Caribe Hulandes. A opta pa realisa e camanan prome na Sint Maarten, debi na e limitacion grandi cu tin na islanan ariba, pa brinda cuido medico na pashentnan contagia cu Coronavirus.

Secretario di Estado Paul Blokhuis, encarga cu maneho di Salubridad Publico, Bienestar General y Deporte, a bisa cu “E carga aki pa Sint Maarten ta un paso concreto den hisa e nivel di cuido medico riba tur e islanan. Continuamente tin reunion cu tur envolvi for di Hulanda te na e parti Caribense di Reino Hulandes. Hunto nos ta trahando duro pa mitiga e plamamento di Coronavirus y na mes momento trata e pashentnan miho posibel”.

Ta bon pa menciona cu separa di aparatonan medico y remedi, cu personal medico tambe ta necesario. Hulanda a yega na acuerdo cu un compania internacional cu ta spacha personal medico. E prome team di Dokter y nursenan lo yega Sint Maarten otro siman mes caba.