Durante e siman cu a pasa Gobierno por medio di Crisis Team a reuni pa evalua diferente extra medida pa reduci contagio di Covid-19. Tambe a revisa protocolnan y haci algun adaptacion, cu e meta pa reduci e contagio den e diferente sector.
A adapta e protocol di cuarentena bek na 14 dia obligatorio y a haci tapaboca obligatorio den tur interior di localidad, tanto pa cliente como trahado. A amplia control di cuarentena y isolacion di “Task forse” y desde diasabra 19 di september ta amplia “Toque de Queda” for di 10:00PM pa 5:00AM y ora di ceramento di negoshi a bira 9:00pm.
Esunnan cu por ta riba caya ta esunnan bayendo trabao of biniendo di trabao; nan mester tin identifacion, carta y schedule di trabao. Si mester bay hospital mester yama 100 prome pa notifica. Tambe a informa cu fiestanan na cas no ta permiti!
Trahadonan cu tin sintoma, no mester bay traha, bo ta core risico di haya castigo disciplinario, ademas di por pega otronan cu e virus.
Tur e medidanan y cambionan anuncia ta necesario pa logra reduci e cantidad di contagio na Aruba y trece esaki na un nivel mas rasonabel pa bienestar di comunidad y Aruba.
“Si tur hende coopera y comporta miho, mas medida no ta necesario, pero prome e casonan di contagio mester baha”, tabata palabranan di Minister President mr. Evelyn Wever-Croes na final di e conferencia di Prensa.
