Coronavirus: Comportacion di comunidad ta laga hopi di desea

Mientras cu diariamente e cantidad di casonan positivo y casonan activo di Covid-19 ta sigui aumenta, e comportacion di comunidad ta sigui empeora. Ta sinti cu sea e mensahe no ta yegando na pueblo of nan no ta interesa den coopera of hasta ta reta e instruccionnan pa keda cas, tene distanciamento social y evita aglomeracion. 

For di diabierna caba polisnan a haya nan mes cu man yen pa controla aglomeracion di hende den barnan y cafenan cu tabata yen di hende, burlando di e regla cu no mag di para na bar y no por tin mas cu 4 persona na un solo mesa. E hecho cu mester yena nomber, adres y telefon di tur cu ta drenta establecimientonan di cuminda y bebida, tambe ta motibo pa resistencia y ta simplemente keda sin respeta e instruccion. 

Mester a parti multa na cantidad y hasta a cera algun establecimiento debi na falta di cumplimento di e reglanan impone pa DVG y crisisteam. E reto principal no semper ta e establecimiento sino tambe e comportacion di clientenan eyden, cu no ta coopera tampoco. E negoshinan, cu debi na retonan financiero ta haya nan ta traha cu menos trahado, tin problema pa cumpli cu e reglanan estricto di DVG. Esey di mes ta hinca nan den problema cu autoridad, ora cu controla nan maneho y cumplimento. 

Pero awe diadomingo e situacion tabata completamente fo’i man na nos beachnan. Tanto na tera a nota aglomeracion pisa di hende, como tambe riba lama den boto. Ta comosifuera cu nos isla ta Covid-Free y cu nos no a surpasa 3000 caso positivo como e pais den Caribe Hulandes cu mas contagio y pa ta un di e paisnan cu mas caso activo na mundo per capita! 

Cu e actitud di e ultimo dianan no ta duna gobierno mucho opcion mas, teniendo cuenta cu contagio a cuminsa drenta scolnan tambe. Ta mustra cu ta perdiendo bataya den e lucha di prevencion. Tene cuenta cu mundialmente 5% di tur pashent contagia ta fayece, cu na Aruba ta nifica 150 ciudadano. Te awo nos tin solamente 18 caso fatal, cu ta un cantidad hopi abou di e normanan cu mundo ta aplicando. Pero kisas e ta un indicacion si di kico ta spera nos den e simannan cu ta bin, si nos no cambia e tactica di prevencion cu nos ta aplicando como pueblo.