Minister Dangui Oduber a anuncia awemerdia pa 2:00pm den un conferencia di prensa di Gobierno cu ayera a eherce 60 test pa Coronavirus pero danki Dios cu tur e testnan a resulta di ta negativo, pues ningun di e 60 personanan no ta contagia cu e virus. Bisando esey, e cantidad di casonan positivo ta keda 55, cu 1 solo pashent cu a recupera, 0 morto y tambe cu tin 672 test haci cu a sali negativo.
Tambe a anuncia cu tin 4 pashent interna den Hospital, di cual 1 ta den Intensive Care Unit (ICU) y lo demas ta stabiel. E otro personanan contagia ta isola na nan cas y ta bayendo bon, pues ningun di nan tin complicacionnan serio pa cual ta rekeri hospitalisacion. Si mira e ultimo diana, ta 7 caso so a bin acerca, locual Gobierno ta hayando bon. Ta spera cu si publico comporta mas, keda cas mas y evita aglomeracion, cu esey lo traduci den menos caso cada biaha.
E mandatario a enfatisa cu contrario na otro paisnan y islanan den Caribe, Aruba ta haciendo mas test per capita y consecuentemente tin mas caso tambe confirma. Minister Dangui Oduber ta considera cu despues di 20 dia caba den e impasse aki cu presencia di Coronavirus riba nos isla, cu nos tin e situacion bou di control. No por papia di un situacion cu no tin mas contagio, pero si cu ta haciendo tur posibel pa wanta e virus aki riba un minimo posibel.
