Awe mainta NV Elmar a informa di un fayo cu a presenta den area di San Nicolas. E clientenan den un area basta grandi a keda henter mainta sin coriente y a logra recupera suministro normal di coriente bek te den oranan di merdia. Sinembargo, un rato pasa NV Elmar a confronta un otro “storing” den e mesun area.
E compania nacional di distribucion di coriente a informa riba nan pagina di red social cu nan tecniconan ta na e sitio pa purba soluciona e fayo mas pronto posibel. “Nos ta lamenta cualkier inconveniencia cu esaki por ocasiona. Lo mantene tur persona informa riba cualkier desaroyo cu por tin relaciona cu esaki”, asina NV Elmar a comunica un rato pasa.
