Core burachi, causa accident y trata di huy

Diasabra despues di 11’or di anochi, polis a wordo manda pa un accidente na Palmbeach un tiki pabou di e filial di CMB. A resulta un Nissan March tabata bayendo pabou ora e chauffeur a wak un auto ta bin su direccion, pero tabata “zig zag” riba caminda.

Aunke e a purba di evita, asina mes no a logra y e otro auto modelo KIA a dal pone spiel di ambos auto kibra. E chauffeur di e Nissan mes ora a bira pa bay tras di e KIA. Un chauffeur den un otro auto cu a wak kiko a pasa, y cu tabata coriende dilanti e KIA, a slow down y asina forsa e chauffeur di e KIA pa para.

E Nissan March mientrastanto a logra di bin bek y a para su auto patras di e KIA. Asina mes e chauffeur di e KIA a purba di reverse pa asina huy pero no a logra. Polis cu a bin a tuma declaracion di tur esnan envolvi y a detene e chauffeur di e KIA pa entre otro pa core bou di influencia di alcohol.