Mirando cu entrante e luna aki Gobierno a adapta impuesto y a añadi BAVP banda di BBO y BAZV, pa un total di 6%, e corantnan Diario, Bon Dia Aruba, Solo di Pueblo y Amigoe di Aruba a dicidi di hisa nan prijs di benta cu 16,66%. Un corant cu normalmente ta costa Afl. 1,50 lo costa awo Afl. 1,75 pa cada edicion, entrante dia 1 di augustus 2018.
Pa esunnan cu ta abona na cas of oficina, tambe lo tin aumento. Di 35 florin pa luna, lo his’e na Afl. 38,00 pa luna, cu ta nifica un aumento di 3 florin, cu ta representa un aumento di 8,5%. Amigoe di Aruba lo aumenta tarifa di abono na Afl. 36,00 pa luna.
Di acuerdo cu e anuncio den corantnan, e aumento tin di haber cu gastonan di operacion mas halto, mara na e aumento di impuesto. Tambe a tene cuenta cu pa hopi aña no a adapta e prijsnan di benta. Aumento den impuesto ta afecta media directamente y hopi biaha ta traduci den menos propaganda, cu ta un di e prome gastonan cu comercio ta evita. Di otro banda, aumento di gasolin ta afecta trabou di reporteronan drasticamente, mescos ta tur otro producto cu ta uza den preparacion, produccion y distribucion di corantnan.
E 4 corantnan aki awor ta para dilanti un reto crucial. Di un banda e aumento den prijsnan pa imprimi y distribui corant cu ta forsa un aumento di prijs di benta, mientras di otro banda e industria digital y websitenan di noticia ta creciendo tur dia bay. Asina mes varios di e corantnan a cuminsa cana e caminda digital, pa purba retene lesado, specialmente e hobennan.
Mester bisa cu di tur e corantnan aki, Amigoe y Bon Dia Aruba ta ofrece e opcion pa abona e corant version completo online. Pa ricibi e version online di Amigoe di Aruba ta costa Afl. 30,50 pa luna, mientras Bon Dia Aruba ta cobra Afl. 200,= pa aña. Esaki mientras cu Awe Mainta ta ofrece su corant completo gratis!
Diario tin un website pero cu noticia limita, mescos ta conta pa Solo di Pueblo. Ningun di nan website no ta cay den esunnan mas bishita na Aruba tampoco. Sigur no compara cu 24ora.com, cu tin e website local mas bishita riba nos isla.
Awe Mainta por ehempel a opta algun tempo atras pa stop di imprimi completamente y bay full digital. E cambio aki a permiti e corant pa alcansa mas lesado, tambe internacionalmente.
Pa loke ta e red social mas popular di Aruba, esta Facebook, e presencia di e 4 corantnan ta como lo siguiente:
- Bon Dia Aruba – 20.879 Likes – 21.421 Followers
- Diario – 18.799 Likes – 18.941 Followers
- Awe Mainta – 12.494 Likes – 12.608 Followers
- Amigoe di Aruba – 6.122 Likes – 6.124 Followers
- Solo di Pueblo – 4.916 Likes – 5.017 Followers
Atrobe, probablemente dor di cuminsa lat den e proceso di publica noticia “online” of dor di no comparti “tur” noticia riba Facebook ta haci e competencia contra websitenan di noticia casi imposibel. Publico tin acceso na noticia gratis y mesora, hasta “bibo” for di e luga di incidente. Pa pone e presencia riba Facebook den perspectiva y pa compara:
- 24ora.com – 58.296 Likes – 60.095 Followers (Facebook di Aruba mas guata y sigui!)
Den e corantnan, e vespertino Amigoe ta esun mas bieu, funda for di aña 1884 caba. Diario ta funda na november 1980, sigui pa Bon Dia Aruba, funda na april 1991 y por ultimo Solo di Pueblo, publica desde september 2005.
