Durante e weekend aki di 30 y 31 di october, Taskforce di Crisis Team di Gobierno lo ta haciendo controlnan extra den areanan di actividad nocturno pa asina controla si ta cumpli cu e medidanan y reglanan pa minimalisa e transmision di Covid-19. Unda tuma nota cu luganan no ta cumpliendo cu e reglanan lo por cera e localidad aki.
Ta conoci cu riba 31 di October hopi ta celebra e fiesta Halloween, sinembargo Aruba ta enfrentando e virus di COVID-19 ainda, pa cual motibo no ta permiti pa aglomera hende, solamente 4 persona ta permiti sinta na un mesa, no ta permiti pa para of sinta na bar, tampoco sirbi bebida na bar. Mester mantene distancia fisico di 1.5 meter di otro persona y tapa boca ta obligatorio si ta sinta paden di un establecimento.
Pa loke ta musica, ta permiti te cu un maximo di 3 musico pa entretene clientenan, pero musica mester ta pa back ground y no duro pa atrae publico. Si e musico of DJ ripara cu hendenan no ta atene nan mes na regla, e lo tin cu para e musica.
Ora di cierre ta 11or di anochi tur dia y 12or pa 5or di mainta tin “gebiedsverbod” pa area di beach y parkinglot accesibel pa publico. Crisis Team ta spera cu cada hende cuida nan mes y cumpli cu disciplina e reglanan pa asina nos por controla e virus, Aruba ta conta cu bo.
