Diasabra manece diadomingo a tuma luga varios control di polis den trafico. Un di nan tabata na altura di La Granja na Savaneta. Ey a para un cantidad di auto, specialmente e famoso “Nisssa March RHD” pa control estricto. A topa cu varios chauffeur burachi, pa cual a detene nan mesora na e sitio. Tambe a topa algun chauffeur sin rijbewijs, pa cual tambe a baha nan fo’i auto y laga nan na pia.
Mester menciona cu durante e control marduga, a detene un chauffeur cu no a mira polis, ora a dun’e ordo pa para y por poco a pasa auto riba e polis. Despues di e incidente e auto a sigui core tambe, pa cual a start un persecucion cortico pero cu a desemboca den detencion di e chauffeur.
Polis a adverti cu e controlnan aki lo continua den e simannan nos dilanti, pa evita e cantidad di autonan riba caminda sin seguro, cu chauffeur sin rijbewijs of cu number sin paga ainda.
