Den un carta manda pa Prome Minister mr. Evelyn Wever-Croes, companianan priva di Heavy Equipment y demas servicionan di limpiesa, a expresa nan preocupacion y inkietud cu ta reina entre nan. Pa e ultimo añanan a bin tuma nota di un fenomeno unda cu Serlimar Sui Generis ta competi na un forma “inhusto” cu companianan priva. Como entidad publico, subsidia grandemente pa Gobierno di Aruba, Serlimar ta goza di un privilegio cu e companianan priva no tin!
Esaki tin como consecuencia cu nan por ofrece un prijs hopi mas abao y irealistico cu companianan priva cu no tin dicho privilegio. Serlimar no ta carga tur e gastonan cu companianan priva si mester carga cune y si core perdida, ta wordo cubri toch cu subsidio.
Separa di recoge sushi di cas, caminda cu tambe por ofrece prijsnan abao, Serlimar awor ta brinda otro servicio. Tur esaki ta haci cu na varios ocasion, companianan priva ta perde trabao y tin como consecuencia cu e companianan aki lo no por opera, cu e consecuencia cu mester cera nan porta.
Un otro preocupacion cu nan tin, ta “tipping fee”, cu a cambia di un dia pa otro di 60 florin pa 1000 kilo te na 180 florin pa 1000 kilo. Un aumento cu mester cobra na e cliente, cual a cuminsa nenga servicio cu e companianan priva ta brinda.
Otro aspecto tambe cu e companianan a nota cu Serlimar no ta tene destaho publico conforme leynan existente, unda cu companianan por ofrece nan servicionan. Pero ta opta pa scoge solamente algun compania “amigo” pa eherce nan trabao. Un muestra di esey ta e trabaonan andando riba Sero Tijshi!
Preocupacion di e companianan aki ta:
* No ta haya husto e forma con Serlimar, cu tin e privilegio di ricibi subsidio di gobierno, ta profila como un compania compitiendo cu e companianan priva, cu no ta haya subsidio di gobierno.
* E “tipping fee” cu a triplifica.
* Destaho publico den Serlimar casi no ta tuma luga. Destaho Publico den un gobernacion drechi y integro ta un “MUST”. Awo parce cu destaho publico ta un excepcion y no regla.
Como empresanan priva, nan no tin miedo di competencia, pero esaki mester ta husto, unda cu tur participante den e scenario ta actua riba un “level playing field.”
Ningun gobierno por permiti su mes pa tipo di maneho inhusto asina tuma luga. Companianan priva Arubiano, cu tin mas di 200 persona den servicio y cu ta cumpli cabalmente cu reglanan vigente, ta spera cu Prome Minister saca un man, no solamente pa e doñonan di compania, pero tambe pa nan empleadonan y nan famia y percura pa ahusta e maneho cu awo ta inhusto di tal manera cu por wordo trata husto y por haya un “Fair Share”.
Finalmente e carta a wordo firma pa doñonan di 22 compania priva cu ta preocupa y a manda e carta aki tanto pa Minister Otmar Oduber encarga cu infrastructura y medio ambiente, como e tambe Fraccionnan den Parlamento, ATIA y Camara di Comercio.
