Consulta di mercado como e siguiente paso pa desaroyo di Port City Oranjestad

1047

Aruba Ports Authority (APA) ta anuncia cu e area di e ex cargo terminal, den e area di e terminal di crucero den Oranjestad cu lo wordo transforma den un area residencial y laboral, ta drentando un fase nobo. Despues di e presentacion y aprobacion di e plan di desaroyo di parti di Gobierno di Aruba y APA na februari 2019, e proyecto a haya su debido nomber ‘Port City Oranjestad’. Pa 2020, APA lo publica e prome percelanan di construccion pa e ‘Port City Oranjestad’ y ta invita e mercado local pa manda nan deseonan y ideanan durante un consulta di mercado.

Cu e desaroyo di ‘Port City Oranjestad’, APA y Gobierno di Aruba kier transforma e area di Oranjestad, ofreciendo un combinacion atractivo di oportunidadnan residencial y laboral cu ta contribui na e desaroyo di e isla di Aruba. ‘Port City Oranjestad’ lo actua como un magneet pa residentenan y turistanan, cu boutique hotels, casnan residencial, oficina, facilidadnan di parkeo, beach, hotel, café, bar, restaurantnan y shops.

E plan ta pa inclui un Water Front Park publico entre e terminal di crucero y Bushiri Beach. Den su totalidad, e area ta 20 hectar di locual 12 hectar ta destina pa wordo comberti den un espacio publico y 8 hectar ta destina pa e desaroyo comercial. Un inversion cu ta estima na 575 miyon dollar mericano, pa e siguiente 10 pa 20 aña. E inversionistanan y desaroyadornan priva lo inverti alrededor di 500 miyon dollar mericano.

APA ta buscando desaroyadornan y asociadonan cu tin experiencia den financiamiento conjunto y e desaroyo di percelanan similar, desde diseño pa operacion te final. Adicionalmente, APA kier uza e oportunidad di consulta di mercado pa haya sa un tiki mas di e necesidadnan di e usuario y operadornan, pa asina por sigura cu e suministro y demanda ta balansa ora cu e invitacion formal tuma lugar. E percelanan di e area lo wordo reparti y desaroya den fase. E consulta di mercado aki ta enfoca riba e percela mas west, banda di Bushiri Beach.

Segun CEO di APA, Marc Figaroa, e proposito di e consulta di mercado ta pa obtene un idea di e deseyonan y ambicionnan di e usuarionan cu finalmente lo hasi uzo di e area y e desaroyadornan di proyecto. Un mihor entendimiento di e deseo y ambicionnan, ta permiti APA apoya e demanda di e mercado. APA ta invita desaroyadornan di proyecto, operadornan di hotel y interesadonan den Port City Oranjestad pa manda nan comentarionan pa APA. Aruba Ports Authority kier crea un area cu Aruba por beneficia di dje pa e siguiente decadanan y pa es motibo e area lo wordo transforma cu un enfoque riba sostenibilidad y e interesnan di e poblacion local.

E Proyecto Port City Oranjestad ta resultado di un colaboracion estrecho entre APA, Ministerio di Turismo, Salubridad Publico y Deporte, Directie Infrastructuur en Planning (DIP), Dienst Openbare Werken (DOW), Aruba Tourism Authority (ATA) y Port of Amsterdam International como capacidad consultivo.

Pa mas informacion tocante e consulta di mercado, documentonan y registracion, bishita

www.arubaports.com/portcityoranjestad