Aruba Dental Society a haci un anuncio cu ta drenta na vigor di inmediato. Manera ta conoci, AZV a adapta su maneho y un di nan ta encera cu nan no ta cubri e trabou di fin di siman di dentistanan mas. E consecuencia di esaki ta bay den man di e consumidor cu no solamente mester paga pa consulta pero ranca djente tambe mester paga.
Aruba Dental Society (ADS), den e declaracion ta menciona algun cambio den e structura di servicionan cu Dentista ta ofrece. Esaki ta encera e trabou di warda den fin di siman y e cambio ta cuminsa entrante awe, 22 di augustus.
E cambionan ta lo siguiente:
– E orario cu e dentista na warda lo ta presente na su consultorio riba diasabra, diadomingo y dianan di fiesta lo ta di 12’or pa 1’or di merdia. AZV no ta cubri e consulta aki y ta bay costa e consumidor 125 florin. E suma aki ta inclui e consulta, x-ray y weekenddiensttoeslag. Tratamento adicional, por ehempel ranca djente, ta posibel, na e tarifa cu e dentista na warda tin stipula.
Consulta di dolor durante siman si AZV cubri.
ADS kier recorda tur pashent pa atene nan mes na e reglanan vigente encuanto COVID-19 di
social distancing, higiena di man y cuarentena/isolacion:
– Pashent cu ta infecta cu COVID-19 of ta biba cu un hende cu ta infecta NO ta atende y mester mantene nan mes na nan isolacion y/of cuarentena obligatorio.
– Pashent cu ta cu den cuarentena obligatorio of ta biba cu un persona den cuarentena obligatorio NO por atende nan. Pashent cu tin sintoma di griep, tosamento (seco) y/of dificultad pa hala rosea, nanishi cu ta core (loopneus), keintura di 38 grado Celsius bay ariba of perdida di smak of holo no por atende nan tampoco.
Otro regla ta uzo di mondmasker (tapa boca) ta obligatorio pa por drenta e clinica. Mester sanitize e mannan y no mishi mas cu e mondmasker te ora haya instruccion pa haci esaki door di e asistente of dentista. Pa siguridad ta tuma temperature di tur pashent y mester y mester spula cu un solucion di hydrogen peroxide (dioxogen).
Nan ta admiti den e consultorio solamente pashent cu tin dolor, cu excepcion di mucha menor di edad cu mester asistencia.
