Consul Mericano: Scuridad no por core cu scuridad

1571

“Scuridad no por core cu scuridad: Solamente luz por haci esey” tabata un dicho masha conoci di Martin L. King di Merca y ta precisamente cu e frase ey Allen Greenberg, Consul General di Merca pa Aruba, Boneiro, Corsou, Sint Maarten, Saba y Sint Eustatius a cuminsa un declaracion na habitantenan di e 6 islanan cu semper tabatin un masha bon relacion cu Merca. “Esaki ta momentonan dificil pa Merca y henter mundo. Noticianan di protesta riba cayanan di Merca ta confuso y doloroso”.

Mas leu e Diplomatico Mericano a subraya cu “Nos mester ta cla: Mericanonan ta sostene libertad di hende pa expresa nan mes pasivamente. Protesta ta representa precupacionnan genuino y legitimo pa mehora e pais. Pero violencia no ta e solucion pa inhusticia”.

Libertad di expresion y oportunidad pa un asamblea pacifico ta derechonan fundamental pa tur hende y nos, cu afortunadamente ta biba den sociedadnan democratico, mester respeta y proteha e derechonan ey si nos kier mantene nan. Pero defende nos derechonan y e causa di husticia mester wordo haci di tal manera cu ta ataca e malo di inhusticia mes y no nos mes.

Terrence Floyd, ruman di e defunto George Floyd, ta pidiendo tur hende pa protesta sin violencia. “Nos tabata na e caminda ey caba,” el a bisa. “(George) lo kier busca husticia e manera cu nos ta haciendo, e manera cu nos ta purbando. E rabia, haciendo daño na bo pueblo natal, no ta e forma cu e kier.”

Ta inspirante pa mira cu a lanta e movecion “Walk with us” (cana cu nos) unda cu Polis ta uni na e protestadonan pacificamente condenando racismo, brutalidad di Polis y pidi pa un fin na violencia di tur banda. Nos por siña di e expresionnan aki di unidad y solidaridad cu e causa di husticia.

Den decada 1960, un protesta violento a sacudi hopi luga rond mundo. Corsou a conmemora su eventonan di “30 di mei 1969″ enfatisando e necesidad inclusivo pa un sociedad multietnico. Nos, como Mericanonan, por siña di e lesnan aki – Por fabor comparti nan cu nos.

Den decada 1960 na Merca, riot y ladronicia a plama den cuidadnan di henter e pais. Den un contexto di racismo y brutalidad, Dr. Martin Luther King, e campeon di husticia social y ganado di un premio Nobel di Paz, a skirbi un buki yama “Where do we go from Here: Chaos of Community.” Den e buki ey, el a captura e consenshi di Merca, poniendo un forma pa atende e husticia cu tanto el a busca.

Dr. King a skirbi: “Scuridad no por core cu scuridad: solamente luz por haci esey. Rabia no por core cu rabia: solamente amor por haci esey. E bunitesa di no violencia ta den su mesun manera y den su mesun tempo e ta busca pa kibra e cadena di malo.

Como nos ta luchando pa forma un union mas perfecto, esaki ta e palabranan cu nos tur tin cu refleha riba dje.