Conseho di Minister a aproba Bureau Medicinale Cannabis

“Esaki ta un industria creciente rond mundo y aki na Aruba tambe tin varios grupo Arubiano cu a expresa di tin hopi interes. Ta uza Cannabis medicinal rond mundo pa trata pashentnan cu ta sufri di diferente enfermedad”, asina Minister Dangui Oduber a duna di conoce. E mandatario ta contento cu su coleganan den Conseho di Minister a aproba e creacion di un departamento nobo cu lo maneha e industria di cannabis medicinal na Aruba.

Den luna di december 2019, Minister Oduber ya a firma un decreto ministerial pa legalisa e uzo di cannabis medicinal y pa por duna permiso pa importa crema, capsula y azeta cu ta di CBD cu un dosis di 0.2% di THC.

Mientrastanto Ministerio di Salud Publico a duna algun permiso caba di importacion, conforme e condicionnan impone, mientras cu Departamento di Inspeccion di Salud Publico ta guiando e proceso. Banda di esaki ta encaminando e proceso di cultivacion y exportacion.

Pa un Gobierno por duna permiso di cultivacion pa cannabis medicinal, e mester cumpli cu e tratado di New York di verdovende middelen. E tratado aki ta bisa cu e pais en cuestion, prome cu kier duna cualkier permiso, mester institui un Departamento di Cannabis Medicinal.

Minister Dangui Oduber a firma un decreto ministerial na December 2019 pa legalisa e uzo di cannabis medicinal, pa por duna permiso pa importa crema, capsula y azeta cu ta di CBD cu un dosis di THC.

E ultimo lunanan Ministerio di Turismo, Salud Publico y Deporte a traha hopi di cerca cu departamento di Recurso Humano (DRH) pa prepara e departamento nobo aki. A traha riba e instellingsbesluit y tambe e formatie rapport pa por presenta na Conseho di Minister. Recientemente Minister Dangui Oduber a present’e na Conseho di Minister y a haya nan aprobacion.

Cu esaki e proceso por cuminsa pa sinta y scucha tur e gruponan cu a expresa nan interes den e industria aki. Mester enfatisa hopi cla cu loke Gobierno ta bay haci ta cannabis MEDICINAL, pues e producto final lo ta cu e proposito di wordo uza, empaketa pa uzo di salud y medico. Esaki ta pa no crea duda y ningun confusion kico ta e proposito di Gobierno.

“E proceso aki ta tuma su tempo, e ta un tema nobo y nos kier haci’e na e miho forma posibel pa e por bira un pilar economico tambe”, asina Minister Dangui Oduber a termina bisando.