Dies dia despues cu fraccionnan di AVP y Futuro a presenta un amienda relaciona cu presupuesto 2025 durante di reunion publico pa esaki, CAft a duna respet na e proximo coalicion nobo cu lo goberna e pais proximo cuater aña.
Den un carta dirigi pa Presidente di Parlamento, Gerlien Croes dialuna ultimo 17 di maart, ta bolbe confirma c’un era nobo ta na caminda, caminda e proximo gobierno lo mustra respet pa e trabou di CFT cu na su luga tambe a duna indicacion cu nan tambe ta respeta un gobierno cu ta den formacion ainda.
E carta di CAft ta duna conseho riba e amienda entrega pa fraccionnan di AVP y Futuro, relaciona cu intencion di e proximo gobierno aki, pa alivia e situacion precario di pensionadonan kendenan tin ocho aña sufriendo formalmente contra un inflacion cu parcialmente a ser crea pa e dos gabinetenan Wever Croes.
Na mes momento e carta di e comision di supervision ta pinta un panorama diferente na loke e dos fraccionnan den oposicion, cu ta esun di MEP y PPA, a trata di cuestiona e amienda entrega y hasta critica e forma con Presidente di Parlamento, Gerlien Croes, kende a schors e reunion riba presupuesto 2025 pa pidi conseho riba cambionan cu lo wordo implementa riba peticion di AVP y Futuro.
Lider di PPA, sr Oduber a considera e amienda entrega pa AVP, como algo cu ta zona simpatico pero ta percura pa preocupacion cu esaki lo ta otro promesa no cumpli pero e reaccion di CAft den su carta di dialuna ultimo, ta practicamente duna su aprobacion na e amienda aki cu ta encera un aumento di “reparatietoeslag” pa pensionadonan.
Oduber a duna declaracion na prensa cu e forma di procede di Presidente Gerlien Croes mustrando cu el a actua robes na inicio di tratamento di presupuesto, CFT no a ni menciona esaki pero e comision ta mustra positivo cu e dos lidernan di e proximo gabinete, den nan prome accion, a dicidi di pidi conseho di CAft.
Minister demisionario y Parlamentario Rocco Tjon tambe a trata di cuestiona e decision di e dos partidonan cu lo forma e proximo gobierno, indicando entre otro cu su partido MEP ta lamenta cu AVP y Futuro ta kita placa di tur departamento creando situacionnan problematico pa nan funcionamento.
Tambe sr Tjon den su intencion pa menosprecia politicamente e amienda entrega pa MEP su rivalnan, cu debi na e recorte di AVP y Futuro, entre otro Departamento di Asuntonan Social no por cubri entiero mas, cual ta un observacion ridiculo, ya cu ainda no a trata presupuesto 2025 pa implementa e medida aki y riba dje ainda gobierno AVP-Futuro no a bira oficial ainda y no tin mandato pa haci esaki.
Pues e carta di CAft ta pone hende corda e dicho na Papiamento hopi bieu cu ta bisa: “ora hende grandi ta papia (Gerlien cu Mike), muchanan tin cu keda afo.”
CAft a reacciona sumamente positivo pero na mes momento ta señala aspectonan cu e proximo gabinete AVP-Futuro tin cu tene nan mes na dje y evita cu e posicion financiero positivo di gobierno, lo bay perdi sin cu a logra di alivia e debe nacional.
