Manera conoci, e serie Mundial di Little League 2025 ta den su etapa final. Awe tin dos wega importante y determinante. Cada ganado lo enfrenta otro diadomingo den e wega pa campeon mundial. Un cos ta sigur, esaki ta algo cu e team a traha hopi duro p’e, conhuntamente cu coachnan y profesionalnan cu a guia e proceso pa un temporada largo, den preparacion p’e momento aki.
Conrad Efrem Orman, Hefe di BMC Facility, no ta un desconoci den mundo di deporte y baseball aki na Aruba. E ta haya cu e resultado aki ta refleha con di berdad ora cu nos traha hunto, nos por logra cosnan grandi, a pesar di ta biniendo for di un isla asina chikito.
“Mi ta hopi contento di mira un trabao conhuntamente den academia cu ta yudando nan, sumamente positivo, resultadonan tremendo. Eynan bo ta mira cu union ta crea forsa den nos pueblo,” Orman ta expresa.
E muchanan ta hayando e oportunidad pa por yega e meta di final pa World Series. Algo sigur hopi grandi pa Aruba. Den su opinion profesional pa loke tabata e preparacionnan haci, Orman ta bisa cu mirando e plannan e ultimo dos aña, e liga central ta enfocando hopi den separa grupo pa prepara nan den por ehempel training fisico, bateo, plan di picheo, e resultado ta papia di su mes. “E concepto di preparacionnan, di un plan cu a traha mas cu djis prepara na ultimo momento un of dos luna. E liga central tin practicamente dos aña preparando, seis pa ocho luna adelanta,” Orman ta bisa.
Orman ta desea e muchanan hopi exito, nos ta un pia mas dilanti y p’e coachnan no perde concentracion, nan tin hopi aña di experiencia y nan ta grandi den nan trabao. “Go for it, tuma tur clase di conseho cu tin prome cu wega, anto disfruta di dje,” Orman ta bisa.
