Diasabra den oranan laat di mainta pa merdia, a sosode un caso serio di agresion cu a conduci tambe na tres detencion di hendenan conoci di husticia. Ta asina cu e conocido sindicalista Coby Geerman, tabata hunto cu su ruman den Village, pa ta preciso Caya St. Eustatius, patras di un rumshop banda di Watertoren na San Nicolas.
Nan a haya problema cu un grupo conoci di husticia, entre nan e grupo di fam Brown. Cos a bay for di man unda cu hasta tabata tin agresion serio cu boter. E sindicalista Coby Geerman a wordo agredi cu boter den cabes y hasta, ora cu el a cay, nan a dal’e tambe cu skop, etc.

Mesora a bati alarma, a meld un pelea pisa na e area aki di Caya St. Eustatius. Ora cu polis a yega, a bin tambe e recherchenan di San Nicolas. E tres personanan cu lo tabata envolvi den e agresion aki, nan a core drenta e cas Caya St. Eustatius 17. Autoridad a pidi permiso na Ministerio Publico pa por drenta e cas. Pasobra nan no kier a habri e cas y a keda scondi den e cas.

Esey a pone cu na momento cu nan a haya e documento legal pa drenta, nan a bolbe pidi famia pa habri e porta y pa e sospechosonan sali. Ora cu esey no a sosode, nan a bay over na kibra e porta di cas y bay aden. Asina ta haci tres detencion den e cas.

Tur tres sospechoso a wordo hiba warda y awor aki ta keda cera tambe riba ordo di sub-fiscal cu a atende e caso serio aki. Naturalmente famianan no a gusta cu e porta a wordo kibra, pero na diferente ocasion a pidi pa habri e porta pa haci detencion y na dado momento a haci peticion tambe e ora na Ministerio Publico y fiscal a duna ok pa kibra drenta.

E victima Coby Geerman a wordo atendi medicamente pa e agresion y su ruman homber tambe a wordo agredi na man di e tres personanan aki cu ta conoci di husticia, cu tabata den e cas y tin di nan ta biba na cas Caya St. Eustatius 17.

Comments

comments