Congreso di Famia ‘Construyendo un Fundeshi Solido

En conexion cu aña di famia, Departamento di Asunto Social den colaboracion cu Ministerio di Asunto Social y Labor ta organisa un Congreso di Famia ‘Construyendo un Fundeshi Solido’.

Congreso
E congreso di Famia lo tuma luga diadomingo 22 di september proximo cuminsando for di 4’or di atardi te cu 8’or di anochi na RIU Palace Antillas (ex Westin) y entrada ta completamente gratis. E congreso ta pa adulto 18+.

E meta tras di e congreso di famia aki ta pa duna tur esunnan interesa informacion compaña cu diferente herment riba diferente topico relaciona cu famia.

Programa
Durante e congreso di famia bou guia di e maestro di ceremonia Jean Carlo Espinal, profesionalnan lo papia di diferente topico relaciona cu famia.

Despues di un palabra di bonbini di un representante di Gobierno, e programa ta cuminsa cu un presentacion di Ramon Todd Dandaré cu e topico “famia di antes y awo”, sigui pa Enid de Kort, terapista di famia y pareha na Departamento di Asunto Social, cu lo papia tocante e “11 tipo di famia y nan retonan”, Enid de Kort lo enfoca riba e “famia mixto” y “relacion entre pareha”. E programa lo continua cu un presentacion di Helen Guda di “Develop To Grow” kende lo haci un presentacion tocante “lantamento di mucha den e tempo di awe”.

E di 4 orador ta Bianca Brown kende ta un profesional riba e tereno di adiccion cu experiencia na Hulanda y na Aruba. Bianca Brown lo papia tocante “malesa den famia” cu enfoke riba “adiccion den famia”.

Como ultimo orador pero sigur un tema hopi importante ta e orador Francis Groeneveldt di “Lead2success” kende lo haci un presentacion tocante “finansas den famia”.

Congreso di Famia ‘Construyendo un Fundeshi Solido

Congreso di Famia ‘Construyendo un Fundeshi Solido. Click e link pa mas. https://24ora.news/2mbRQJM

Posted by 24ora on Wednesday, September 11, 2019

Registracion

Pa participa na e Congreso di Famia dia 22 di september proximo mester registra prome. E registracion ta uno digital y hopi facil. Riba e pagina di facebook di Departamento di Asunto Social tin un post cu e flyer promocional y den e post un link pa registra, of por registra tambe door di bishita www.asuntosocial.aw y klik riba congreso di famia y yena e formulario.

Pa tur persona cu no ta dispone di un ‘smartphone’ of computer por registra telefonicamente na 528-1153 cerca Jesseline Soto Garcia-Kelly.

Departamento di Asunto Social ta invita henter e comunidad di Aruba pa tey presente na e Congreso di Famia ‘Construyendo un Fundeshi Solido’ diadomingo 22 di september proximo.

Comments

comments