E sentimento di consumido a sigui deteriora den e di tres trimester di 2019, segun e ultimo resultadonan di e Encuesta di Confiansa di Consumido (CCS) di Banco Central di Aruba. E Indice di Confiansa di Consumido a cay te na 94,0 for di 95,1 den e trimester anterior, indicando sentimentonan relativamente mas pesimista.
Mester bisa cu regularmente Banco Central di Aruba ta midi e nivel di confiansa di consumidonan riba nos isla. Ta haci esaki atraves di encuestanan cada trimester den aña. Asina por mira claramente ora tin mehorcion of deterioracion di e sentimiento cu ta biba den pueblo.
E indice por varia entre 90 y 110. Entre 90 y 100, e indice ta mustra un situacion di pesimismo. Un indice di exactamente 100 ta indica cu consumidonan no ta ni optimista, tampoco pesimista, pero ta neutral den nan pensamento di desaroyo na Aruba. Entre 100 y 110, e indice ta mustra un situacion di optimismo den pensamento di consumidonan.
E prome componente, esta e Indice di e Situacion Actual a deteriora den e di tres trimester di 2019, bahando cu 1,4 punto di indice te na 92,6. E causa principal di esaki ta e caida den e indice di situacion financiero di gobierno actual cu 2,9 punto di indice, esta di 95,4 pa 92,5. E indice di situacion personal financiero actual tambe a bira mas pesimista den e di tres trimester di 2019, esta di 96,6 pa 96,3.
Adicionalmente, e indice di condicionnan di negoshi y economico actual a bay atras tambe cu 1,0 punto di indice, esta di 91,8 pa 90,8. Ademas, e indice di situacion laboral actual a cay cu 1,4 punto di indice, esta di 92,3 pa 90,9
E di dos componente, esta e Indice di Expectativanan ta esun cu a deteriora mas den e trimester bou di revision, bahando cu 1,9 punto di indice te na 93,9. E indice di expectativanan posicion financiero di gobierno a cay significantemente, esta di 97,0 pa 93,8. Consumidornan tabatin expectativanan menos positivo riba nan situacion personal financiero, como cu e indice aki a bira mas pesimista, di 98,4 pa 97,4 (un minoria di 17,0% di respondientenan a indica cu nan situacion financiero lo ta miho den e siguiente 6 luna, un rebaho compara cu 21,8% di e trimester anterior). Banda di esaki, e indice di expectativanan condicionnan di negoshi y economico a bira mas negativo, esta di 94,5 pa 92,4. Ademas, e indice di expectativanan laboral a baha cu 1,4 punto di indice te na 92,0.
E di tres componente, esta e Indice di Habito di Consumo a mengua durante e di tres trimester di 2019, esta di 96.4 pa 96,0. Consumidonan tabata negativo riba tur componente di e Indice di Habito di Consumo, esta; compra di auto, compra di acesorionan duradero, bay cu vakantie, cera un prestamo y cera un hipoteca.
E gran mayoria di respondientenan (89,0%) ta anticipa cu prijsnan lo subi den e siguiente 6 luna, resultando den un Indice di Expectativanan di Prijs di 90,2 compara cu 90,6 den e trimester anterior.
Resumiendo, e deterioracion den e confiansa di consumidor ta atribui na bahada den tur componente.
