Tur aña tin un conferencia episcopal di Antia, caminda varios pais ta forma parti di dje. Segun Monseigneur Luis Antonio Secco, obispo di Willemstad a splica cu casi semper ta haci esaki na diferente pais cu ta forma e conferencia, cu lo ta consisti di 7 diocesis y arkidiocesis. E aña aki ta toca turno n’e diocesis di Willemstad. Door cu otro diocesis a cay afo pa motibo cu e obispo no tabata bon di salud, a pidi si por bin n’e diocesis di Willemstad.
Monseigneur a pensa di biaha cu e diocesis tin un isla bunita cu ta cay bao dje, cu yama Aruba, cu ta forma parti di e seis islanan di e diocesis di Willemstad.
A yama di biaha pastoor Andres y a yega na un decision. E conferencia di e obisponan di Antia lo tuma luga na Aruba. A sinti cu e parti aki di participa y tuma e rienda di e conferencia na Aruba, lo bira un desafio, pero danki n’e cooperacion di e medionan, particularmente esunnan cu a pone material y luga disponibel pa por keda, e trato cu Aruba ta haci pa turista, pero den e caso aki e representantenan di e diocesis di e conferencia, a bira un echo.
Monseigneur Secco a gradici un y tur pasobra tambe tabatin un gasto basta grandi di hotel, di cuminda y bebida, di biahe, di haci e actividadnan. Tin di bisa cu tur esaki ta bayendo hopi bon.
Monseigneur Secco a splica cu e conferencia aki ta di e islanan chikito den Caribe, cu ta forma pa un cantidad di teritorio.
Ya caba diasabra awo e delegacionnan lo yega y diadomingo dia 23 di april, lo tin e apertura di e conferencia cu un dia di retiro. Esey ta nifica e obisponan ta keda den un retreat henter dia. Pero atardi pa 6:00 pm lo tin un celebracion bunita di eucaristia na Pro-Catedral San Francisco.
Esey lo ta algo bunita cu obispo Secco ta invita tur cu kier bin y tambe por mira esaki via medio social, lo por bay scucha y sigui e apertura di e conferencia.
