Pa e sindicato mas grandi den empleadonan publico, SEPPA, e condicionnan riba mesa awo mara na e fiansa di 204 miyon florin ta inaceptabel. Nan a bisa Gobierno esey siman pasa caba y e siman aki ta cuestion di ripiti nan posicion atrobe, pues Magali Brito a sigura cu SEPPA no a cambia di decision. “E ta hopi cla cu locual cu tin riba mesa, pa e trahado, ta bay liña recta contra lucha sindical den pasado. E ta nifica un retroseso grandi y esey nos no ta acepta”, asina Brito a bisa.
E sindicato di docentenan, SIMAR, di un banda ta contento si cu porfin Gobierno a cuminsa duna atencion na sindicatonan y a habri dialogo real. Prome cu esaki no tabatin ningun sorto di dialogo y ta den media ta haya tende di decisionnan tuma. Pero awo ta hayando informacion y ta scuchando nan opinion. “Nos ta contento cu a realisa awor si cu dialogo ta importante, no solamente entre Aruba y Hulanda, pero tambe cu gremionan”, asina Josephine Albertus di SIMAR a expresa. E ta spera cu lo continua cu e forma di traha aki.
E sindicato ABV di enfermeronan, a anuncia cu ayera nan a firma un carta hunto cu tur partner den cuido. Parce cu CAft a duna Secretario di Estado Knops un conseho pa baha e presupuesto di AZV cu 5 miyon. Pa kibocacion a tuma e conseho comosifuera ta 5 miyon florin pa luna, siendo cu CAft lo tabata kiermen pa aña. Ayera varios entidad a firma un carta hunto pa Conseho di Minister di Reino Hulandes den cual ta pidi pa corigi e eror aki, pasobra e ta causando un daño masha grandi den sector di cuido. Specialmente Hospital a hay’e man mara y casi no por traha mes mas pasobra el a traduci den 700 mil florin menos pa luna for di AZV.
Pa loke ta e flexibilisacion di leynan laboral, e sindicato mas grandi den sector priva, FTA, a bisa cu introduccion di e ley aki lo causa mas problema cu solucion. Pa Hubert Dirksz, e ley aki ta contradictorio pasobra e no lo percura ni pa mas empleo y ni lo duna mas siguridad laboral. Desempleo tin un porcentahe di solamente 16% bou di hobennan, cu compara cu otro paisnan, di nos ta mas abou. Pues no ta tur punto cu Hulanda a trece, cu nos mester aplica asina, di acuerdo cu Dirksz di FTA.
E hecho cu Gobierno di Aruba, den e caso aki Minister Presidente Evelyn Wever a logra habri porta na Hulanda, a cay den masha bon tera cerca e organisacion comercial ATIA. Michelle de Groot a bisa di ta spera cu e contraoferta cu ta drenta awe for di Hulanda pa Aruba, lo por percura pa habri mas dialogo pa por yega na un solucion cumbiniente pa ambos pais.
Sindicato SADA, cu ta representa Duaneronan a bisa di ta compronde e posicion di Hulanda cu kier investiga corupcion na Aruba. “Desde cu Gobierno a sinta ta papia di un integriteitskamer y depsues di 3 aña ainda nada no a sosode. Nos a maak mee varios caso interno di corupcion cu ainda Gobierno no a haci nada”, asina Edward Maduro di SADA a bisa awe. E ta haya cu Gobierno di Aruba mes a habri espacio pa Hulanda por a bin cu e maneho nobo aki pa combati corupcion den Gobierno.
Na final e sindicato SEPPA a bisa cu, considerando tur e puntonan treci padilanti, teniendo na cuenta e puntonan positivo y esunnan negativo, cu na e momento aki SEPPA no por aproba ni sostene e condicionnan aki y a conseha Gobierno pa tampoco bay di acuerdo cu nan, sino lo hinca trahadonan y nos pais completo den hopi contratiempo, net awo cu nos ta den un crisis.
