Jefferson Dario Amaya Larrada (38), Chavier Joscar Reyes Rivero (36) y Jairo Rafael Pinero Palencia (59) a haya un condena di mas cu 5 aña pa un cargamento di 456 kilo di cocaina cu a haya nan cu ne riba un boto.
Ta trata di un caso unda cu hasta tiro di advertencia a cay pa motibo cu nan no kier a sigui ordo di personal di Kustwacht. E echo aki a tuma luga riba 28 di juli di aña pasa. A haya e capitan (Colombiano) cu un peña di pistol tambe.
E acusadonan a acepta e echo pa cual e tratamento di e caso a bay relativamente lihe.
Loke cu a hala atencion den e caso aki ta cu den e procesverbaal ta para cu Kustwacht a haya informacion riba 27 di juli for di marina Colombiano cu tin un go fast biniendo Aruba y cu abordo aparentemente tin cargamento di droga. E pregunta ta cua t’e motibo cu nan mes no a para e boto na su salida y a lag’e den man di autoridad di Aruba, cu ta nifica gasto extra pa mantene e trio aki durante 5 aña.
Echo ta cu a base di e informacion ricibi for di autoridadnan di Colombia a sigui un vigilancia estricto y asina cu a nota riba radar cierto movecion, a mobilisa e unidad di Kustwacht direccion di e punto en cuestion. Esey tabata un poco despues di 10:00 pm riba dia 28 di juli.
A manda e metal shark direccion di e nave stranhero y ya caba cerca a duna nan ordo pa para, pero a dicidi di subi velocidad y trata di huy. Nan a sali for di awa teritorial di Aruba y a drenta e zona di pesca y ey ta caminda a los tiro di advertencia. E momento ey nan a dicidi di para.
Rond di 11:00 a aborda e nave stranhero pa cuminsa investiga kico tin abordo. A bin descubri dos area, compartimento scondi y a bin descubri 19 bulto y jute zakken den cual tabatin mas cu 450 paki cu un substancia blanco. Pero tambe a haya e peña cu 13 bala di 9 mm den dje.
No a keda otro di lastra e nave trece tera na Aruba na e base di Kustwacht na Savaneta.
E storia di di trio ta mescos cu otro. Jefferson tabata esun acerca door di un homber na Colombia mas o menos un siman prome cu e transporte a tuma luga. E homber a ofrece un trabou di hiba droga a cambio di pago.
Pa haci e trabou, Jefferson mester a busca dos persona, el a contact dos persona di cual un di nan ta capitan, esta Jairo. El a haya un pago adelanta di 2 mil dollar. Cu esaki e mester a cumpra gasolin y a duna e otronan un adelanto.
Doño di e droga a percura pa pone e bultonan riba e boto, a dun’e e arma y a bis’e unda mester hiba e droga, esta na un isla cerca di Aruba. Ey mester a tira e droga y despues bolbe Colombia.
Na momento cu el a mira cu a intercepta nan, el a spanta y a tira e arma di candela den lama hunto cu un peña y a lubida cu e tabatin e di dos den su saco di carson.
Den Corte, capitan Jairo a conta Hues cu nan a ofrece 2 mil dollar pa navega e boto pa entrega e droga. Pero e placa e no a hay’e completo sino un adelanto di 500 dollar.
El a bisa cu e mester a bay Islas Los Aves, unda cu tin un persona cu mester a tuma e droga. E mes a yega y a haya droga y e otronan abordo di e boto caba. Esaki a zona poco straño pasobra nan mester a bay e islanan menciona, pero nan tabata den awa teritorial di Aruba.
Tur e acusadonan a bisa cu nan a haci e trabou aki pasobra nan tabatin mester di placa.
Esaki, fiscal di su banda a splica, tabata un di e diferente botonan cu a intercepta durante aña 2022 y cu tabatin droga abordo. A papia di e peliger cu droga ta forma pa un comunidad y di e cantidad grandi confisca.
Den e castigo, fiscal a tene cuenta cu loke ta norma di Hof. Pa Jairo y Chavier fiscal a pidi 5 aña y seis luna. Pa Jefferson, haya cu e peña cu bala, a pidi un castigo di 5 aña y 7 luna. E boto a pidi pa verbeurt esaki y tambe un cartera cu placa. Hues a cera tratamento di e caso. El a bisa e acusadonan cu e delito ta proba y cu e ta haya cu e demanda di fiscal no ta nada for di sla y el a bay di acuerdo cu esaki.
