Concierto Marco Antonio Solis cu concepto nobo pa Aruba

Mirando e gran acogida cu e magno concierto di Marco Antonio Solis ta ricibiendo na Aruba, promotornan a mira e necesidad pa un seccion nobo y unico cu pa prome biaha ta wordo presenta riba nos isla. Ta trata aki di un seccion special pa personanan cu limitacion.

Ta trata aki di un seccion na unda personan lo ricibi un seccion separa, cu entrada separa na unda cu no lo mester para den fila regular y lo facilita e acceso na e personan aki pa por gosa di e concierto den un forma special y unico. E seccion aki lo costa 125,- pa persona y ta permiti pa trece un acompañante cu tambe lo por cumpra su ticket na un prijs special di 125,-.

E concepto aki ta algo unico y ta premira di lo ricibi un gran acogida den comunidad. Banda di esaki, e promotornan sigur ta asercando e gremio comercial na Aruba pa aporta na e bunita gesto aki. Empresanan interesa pa por contribui na realisa e concepto nobo y unico aki, por tuma contacto cu e promotornan y lo por asina cumpra ticket pa e grupo aki na nomber di e empresa.

Esaki ta un concepto completamente nobo y nunca antes mira na Aruba. Hopi biaha nos personanan cu limitacion tambe tin hopi gana di por presencia un di e conciertonan aki, pero no ta posibel y awor esaki a bira un realidad!

E promotornan no tin ningun duda e esaki ta un tremendo oportunidad pa companianan contribui y duna bek na comunidad. Sinembargo si abo ta interesa pa cumpra bo propio ticket tambe bo por pasa libremente na oficinanan di Marco Antonio Solis situa na Renaissance Seaport Marketplace y busca bo entrada preferencial cu lo inclui un bebida y un snack. E concierto aki ta premira di bira e concierto di aña 2019 dia 10 di November proximo! No perde!