Diadomingo awor, dia 30 di juni 2019, Fundacion pa Talento Musical Donny Laclé ta organisa su popular Concierto Dominical den e sala grandi di Biblioteca Nacional Aruba den Madurostraat.
Un biaha mas a logra hinca un programa interesante y varia den otro cu sin duda lo cay na agrado di e audiencia.
E prome presentacion ta na encargo di e cantante–guitarista Jersey Sofia. E lo presenta diferente piesa di su propio inspiracion.
Despues e publico presente por gosa di baile dinamico di Diana Antonette y su elenco di bailado. E grupo di baile aki lo inspira tur hende sigur pa cuminsa of pa sigui practica nos bailenan Arubiano-Antiano.
Ta clausura e mainta cu Tipico Tradicion Musical cu ta bou di direccion di Joffrey Angela.
E mensahe di señor Angela ta cu tur hende mester sgui e ehempel di Diana y su grupo y subi pista di baile, pasobra ta p’esey nan ta toca.
Comision organisado ta invita tur e bishitantenan fiel di Concierto Dominical y henter pueblo di Aruba pa bin pasa dos ora agradabel y divertido diadomingo awor dia 30 di juni na Biblioteca Nacional Aruba.
E concierto ta cuminsa exactamente 11.00 or di mainta y ta dura te mas o menos 13.00 or. Ta recomendabel pa yega trempan pa haya un bon luga.
Entrada ta gratis, pero semper por haci un donacion boluntario durante e concierto, pa e fundacion por sigui yuda nos hobennan talentoso den nan estudio musical.
Bini uno, bini tur!