Pa e temporada dushi cu ta acercando, esta Pasco di Nacemento, Fundacion Kapel di Bethania dia 16 di december ta organisa un evento na Klooster Imeldahof na Noord.
Fundacion Kapel di Bethania tin como meta principal pa mantene y conserva e kapel como tambe e historia di e edificio Klooster Imeldahof.
Na aña 2021 a declara no solamente e edificio pero e parti interior di e kapel como monumento proteha. E kapel ta unico den su originalidad na henter Aruba.
Canto di Pasco’ lo tuma luga dia 16 di december cuminsando pa 6:00pm.
Esaki lo ta un anochi di concierto bao direccion di nos cantante conoci Tica Giel y pianista Igmar Maduro. Lo tin como cuater coro, solista- y agrupacionnan conoci di e districto di Noord. Nan lo bay entretene e publico cu diferente cantica di Pasco.
Banda di esaki lo tin presentacion di e grupo infantil ‘Angelnan di Rosario’ cu lo interpreta un obra teatral di e pesebre bibo.
Pa nos keda den e mesun esfera di Pasco lo tin un bazaar unda lo por cumpra diferente articulo, cuminda, pasaboca y cos dushi di Pasco.
