Ningun momento e Rijkkswet HOFA, esta “Houdbare Overheidsfinancien Aruba,” cu Conseho di Minister di Reino a confirma cu el a ricibi, ta un concepto cu a wordo acorda pa ex Prome Minister Evelyn Wever Croes, for di 2024 caba pero cu ainda tin cu wordo trata tanto den Tweede Kamer como Parlamento di Aruba prome cu e bira oficial.
Den e ley aki ta wordo regla e ‘College Aruba financieel toezicht’ con esaki lo tuma luga y caminda ta mustra bon cla cu CAft lo sigui hiba su supervision financiero manera el a bin ta haciendo pa algun aña caba y lo conseha Conseho di Minister di Reino si Aruba lo ta cumpliendo cu palabracionnan cu a wordo haci, atrobe pa ex Prome Minister Evelyn Wever Croes.
Aki tambe tin cu mustra cu tin un asina yama ‘Bestuurlijk Akkoord’ cu tambe e lider di MEP a firma riba e proceso di e ley menciona, cu a tuma luga caba for di 2024 caba ora cu gabinete MEP-RAIZ tabata na mando y entre otro tin un rapport cu ta confirma esaki.
“In het Bestuurlijk Akkoord is voorts afgesproken datg het ontwerp van de RAft, data enige tijd bij de Tweede Kamer ligt, zal wordo ingetrokken. De reden hiervan is dat de Rijkswet in plaats van dat ontwerp (en van de LAft) zal treden. Inmiddels heeft deze intrekking n op 23 april 2025 plaatsgevonden.”
Pa logra di yega na un palabracion pa reduci e interes riba loke gobierno di Aruba tin cu paga pa e ‘covidlening,’ cu awor ta costando Aruba casi 30 miyon adicional pa aña, tabata e lider di MEP den su calidad como Prome Minister di su gobierno, cu a firma e palabracionnan aki for di 20254 y si tur hende por corda, el a haci un show grandi bisando cu el a logra di bari e Rijkswet for di mesa.
Awor e documentonan ta mustra cu ningun momento esaki a tuma luga pero al contrario e acuerdo cu e lider di MEP a firma cu Secretario di Estado e tempo ey, van Huffelen, ta cu Aruba ta bay di acuerdo cu introduccion di e Rijkswet manera por tuma nota cu a documento adhunto.
Por a tuma nota cu lider di fraccion di PPA ta cuestiona e hecho cu gobierno actual a presenta e concepto di ley na Tweede Kamer sin cu esaki a ser trata pa Parlamento di Aruba pero esaki no ta e caso ya cu tanto Parlamento Hulandes como esun di Aruba, ainda tin cu trata e concepto di ley aki y si nan aproba e concepto aki, e ora e lo drenta na vigor.
Loke ta hunga un rol den e caso di Parlamentario Oduber, ta e hecho cu su persona tabata for di politica pa casi cinco aña ora su persona mes a dicidi di bandona politica pa bay atende cu su negoshinan priva y den e periodo aki, tin hopi desaroyo cu a tuma luga y caminda ex Prome Minister nunca a informa parlamento di esakinan.
Ora cu tuma nota con fraccion di MEP a dicidi di bay oficina di Gobernador pa entrega keho contra di Presidente di Parlamento Marlon Sneek pa motibo cu el a schors e reunion di diabierna pa tempo indefini, ta mescos cu nan carga awa hiba lama ya cu ta un asunto cu tin envolvimento di gobierno Hulandes den e proceso cu tin cu sigui y como tal ta dificil pa crea un ambiente di desconfiansa contra di Presidente Sneek riba su forma di procede.
Den fin di siman tambe a sali den medionan do comunicacion di Hulanda caminda ta mustra riba un declaracion di lider di MEP, Evelyn Wever Croes, kende ta bisa cu gabinete Schoof no tin autoridad pa negocia asuntonan cu ta regarda autonomia di Aruba na e momentonan aki pero un biaha mas por ripara e frustracion grandi di un politico cu a perde su poder y ainda no por adapta su mes den e rol nobo den banki di oposicion.
Ta mas cu claro cu mesun prensa Hulandes a mustra e ex prome minister di Aruba y siman pasa gabinete Schoof a sobrevivi un mocion di desconfiansa den Tweede Kamer caminda aki sano huicio a prevalece y no a tuma medidanan drastico cu no ta sirbi e interes general di e pais.
Gabinete Wever Croes II a sigui traha den su status demisionario te cu 25 di maart di e aña aki y den e periodo aki a firma cantidad di documento, a nombra cantidad di nan hendenan den diferente departamento di gobierno y hasta e permiti decisionnan wordo introduci na algun compania estatal, den un periodo cu su gobierno tabata demisionario.
Na e momentonan aki Tweede Kamer lo no trata e concepto di Rijkswet cu tin riba mesa pero esaki lo tin cu spera riba e proximo gobierno nobo di Hulanda, caminda e proceso aki lo por drenta aña nobo sin cu tin un gobierno di coalicion nobo pa e pais.
