Pa por mantene bon contacto cu bo yiu mientras e ta yegando e periodo di teenager y ta birando mas independiente ta parce dificil. E por ta un reto, pero bon contact den e periodo aki ta hopi importante.
Mientras e actividadnan di scol, interes nobo y amistad ta birando mas importante pa bo yiu, abo como mayor semper ta keda un pilar pa nan, door di duna amor, guia, y sosten. E conexion aki ta provee un sentido di siguridad pa bo yiu y lo yuda nan anda cu situacionnan agradabel y menos agradabel.
Kico bo por spera?
Bo yiu por haci manera e no mester di bo guia. Hasta tin ora e ta sinti manera berguensa di bo. Esaki ta ora e mucha pre-teen cuminsa confia y kere mas den muchanan di su edad y ta exigi espacio y privacidad. Bo por spera cu e ta cera porta di su camber mas frecuente.
Aunke con dificil e cambionan aki ta pa anda cu nan, purba pa no tuma nan como algo personal. Nan ta señalnan di e independencia di bo yiu cu ta creciendo. E miho manera pa anda cu e cambio nan aki ta door di tin balansa. Duna nan e espacio pa crece y expande nan limitenan, pero sigui enforsa reglanan y balornan importante di cas.
No ta intencion pa bo los laga bay completo. Ainda bo tin un influencia fuerte como mayor. Pero bo yiu kisas lo ta mas responsivo na e ehempel cu bo ta duna enves di e instruccionnan cu bo ta duna. Cu otro palabra, practica bon loke bo ta bisa, pero purba di bisa y duna menos instruccion. Door di mustra e calidadnan cu bo kier bo yiu pre-teen siña y practica, manera comunicacion cu respet, amabilidad, come saludabel, cumpli cu responsabilidadnan diario sin keha, bo yiu por acepta nan mas facil.
Kico bo por haci?
Cosnan simpel y chikito por reinforsa e conexion entre boso. Pone tempo den bo schedule pa momentonan special, probecha di rutinanan cu boso ta comparti caba y mustra bo yiu cu bo ta pendiente di dje.
Aki ta sigi algun tips:
- Come hunto:
Pa prepara cuminda por ta un tarea dificil pa algun mayor, specialmente despues di un dia largo. Pero sinta y come hunto ta provee tempo valioso hunto cu otro. Pues schedule y organisa esaki, mescos manera e tabata cualkier otro evento. Hasta si ta un cuminda di take-away, ta importante pa sinta hunto y come. Paga television y baha ringtone di e telefon si por. Si no ta posibel come hunto tur dia, planea un bes pa siman teniendo na cuenta e schedule di bo yiu tambe. Purba envolvi tur den cas cu preparacion di e cuminda. Pone y kita tayo y bestek for di mesa. Si tur yuda e ta reinforsa e sentido di responsabilidad y teamwork den cas. - Ora di drumi y bisa bon nochi:
Por ta bo no mester pone bo yiu drumi mas, pero ta importante si pa mantene un rutina consistente pa ora di drumi. Asina bo yiu por haya suficiente sosiego pa crece bon y fuerte. Hunto boso por lesa un buki, repasa cosnan cu a pasa den dia y papia riba loke tin pa mañan. Aunke bo yiu no ta na e edad mas unda cu bo ta pone drumi toch tin luga pa un sunchi y brasa di bon nochi. Si bo ripara cu e no kier esey mas, bo por pone man suave riba su schouder of lomba y dese’e bon nochi. - Pasa tempo cu otro haciendo actividadnan di rutina:
Busca cosnan chikito pa haci pa boso por ta den otro su compania. Puntr’e pa bay cu bo ora bo ta bay cana, bay supermercado, of por laba auto hunto, traha cuki, wak programa di television, etc. Esakinan ta bon ocasion pa papia riba loke bo yiu ta pensa of tin riba su curason. Hasta ora boso ta hunto den auto ta un bon ocasion pa traha riba un bon contacto. Por tin asuntonan cu ta preocup’e. Ya cu abo ta coriendo auto y mester pone atencion riba caminda, bo yiu por sinti’e mas liber pa papia. - Crea tempo special:
Introduci tradicion nobo p.e. pa logronan di famia (ora di haya bon rapport of den deporte e yiu a gana un wega). Festeha e ocasionnan aki. E lo yuda e union familiar.
- Mustra afeccion:
No mester subestima balor di afeccion. Bisa y mustra bo yiu pre-teen cu bo ta stim’e y elo sintie mas sigur y stima. Den publico y rond di su amigonan kisas e no ta gusta pa bo mustr’e afeccion na manera asina bisto. E lo purba hala atras pa no haya bo brasa of sunchi. No tuma e reaccion aki personal. Reserva e forma di afeccion aki pa ora no tin amigo acerca. Busca otro forma pa mustra afeccion den publico, p.e. un smile of zwaai man ta ok, e ta un muestra di bo afeccion.
Laga bo yiu sa hopi cla con bo ta reconoce su calidad y habilidadnan creciente p.e. “E pintura aki ta hopi bunita, di berdad bo ta hopi artistico!” of “Bo tabata tremendo den training awe di basketball. Mi ta gusta wak bo hunga asina!” - Keda envolvi bo mes:
- Keda envolvi, no entremete, den bo yiu su actividadnan. Door di esaki bo ta pasa mas tempo cu otro y intercambia experiencia. Bo no mester ta presente na tur su actividadnan tampoco. E mes lo kier ta bezig cu actividadnan unda abo no t’ey. Asisti na e actividadnan cu bo por y ora bo no por puntra bo yiu con esaki a bay y scucha bon loke e ta conta bo. Yuda bo yiu papia riba su desapunto y mustr’e bo comprension. Bo manera di reacciona riba e desapunto por siña bo yiu pa acepta y pensa cu nan ta ok y cu mester tuma curashi pa sigui purba.
- Keda mustra interes:
Mustra interes den su idea, sentimento y experencianan. Si bo scucha bon loke e ta bisa bo ta haya bon idea di ki apoyo y guia e kier di bo. Ora bo reacciona na un manera cu bo no ta husgando, bo yiu ta mas inclina pa bin cerca bo ora e tin asuntonan menos agradabel pa anda cu nan.
