Colonia Peruano residencia na Aruba ta celebra nan Dia Nacional cuminsando dia 27 di juli awor. Esaki ta tuma luga den Centro di Bario Dakota, cuminsando for di den oranan di merdia. Sra Livaney Lujan, Vice presidente di e Fundacion Fiestas Patrias Peruanos en Aruba a anuncia esaki durante un conferencia di prensa diamars merdia.
E dia aki ta wordo caracterisa pa e platonan tipico di Peru, manera anti-cuchos, ceviche, tamal, pachamanga, etc. Pa e dia aki e grupo “Los Amigos” lo deleita esnan presente cu musica di Peru. Tambe ta bay tin actividadnan deportivo.
Pero e celebracion mes ta riba diadomingo, 28 juli, ora cu ta recorda y celebra e 198 aña di independencia di Peru. Guillermo Salinas, presidente di e fundacion a elabora riba e fiesta grandi di diadomingo mes. El a cuminsa na haci un invitacion na henter e comunidad Peruano pa participa den e Programa Protocolar cu ta cuminsa pa 10’or di mainta y lo dura te cu 12.30 di merdia den Wilhelmina Park. Minister, Parlamentario y Diplomaticonan a haya invitacion pa participa den e ceremonia aki.
Salinas a conta brevemente e historia di e lucha di Peru pa haya nan independencia, despues cu pa hopi siglo nan tabata esclavo tempo di Rey Carlos V di Spaña. Despues di hopi lucha y perdida humano, e pais aki a logra haya su independencia.
Pa recorda e fecha aki henter comunidad di Aruba ta ser wordo invita pa bin celebra y participa den e reconocemento cu ta bay duna na algun persona. Nan a gradici Departamento di Cultura cu a contribui na organisacion di e celebracion aki por medio di sr. Stan Dabian.
