Diaranson e comunidad Dominicano a reuni riba e Plaza Juan Pablo Duarte, pa asina conmemora 175 aniversario di e constitucion di Republica Dominicana.
Pero tambe pa expresa nan preocupacion, ya cu nan kier elimina loke ta trata e escudo for di e bandera di Republica Dominicana, segun Winston Tavares, presidente di Fundacion Dominicano Arubaanse Juan Pablo Duarte y presidente di e filial Duartiano na Aruba.
E ta sigui splica cu e bandera di Republica Dominicana a wordo crea na 1844 y no por permiti bao di ningun circunstancia cu e escudo di e Republica Dominicana wordo elimina for di e bandera.
Ta pa e motibo ey ta haci un yamada na tur Dominicano pa uni na e noble causa aki pa por fabor uza nan simbolo patrio, nan bandera tri color Dominicano, hisa nan tur dia si tin mester y acudi cerca e fundacion pa cualkier informacion.
Eliminacion
Tavares a expresa cu nan no sa si kier pa e poblacion cay bao di e liderasgo di Haiti, cu 22 aña pasa Republica Dominicana tabata wordo lidera bao di Haiti. Esaki ta algo cu no mester permiti nunca mas. Ta pa e motibo aki mes, a expresa nan preocupacion di e forma aki.
Te aworaki no tin e informacion concreto ken a bin cu e propuesta pa elimina e escudo for di e bandera. Mayoria di e Dominicanonan rond mundo, ta expresando nan preocupacion. Aworaki tin pensa di manda un carta, di parti di e grupo Duartiano, hunto cu e grupo Folklore Cultural Dominicano y demas institucion y iglesianan cu ta preocupa pa e hecho aki.
Grupo Folklore Cultural Dominicano
Ramona Campos Garcia, directora di e Grupo Folklore Cultural Dominicano, tambe a expresa cu tur migrante Dominicano cu ta bibando na Aruba, ta organisando e comunidad y semper ta uni, manera e dicho ta bisa “Uni nunca nos lo ta venci”.
Tur organisacion rond mundo ta haciendo echo pa e eliminacion di e escudo for di e bandera Dominicano.
Na Aruba, organisacionnan manera Iglesia, Fundacion, y e comunidad no ta di acuerdo pa elimina esaki. Mester preserva e balornan patrio, segun e directora. Republica Dominicana ta un pais liber y independiente di tur nacion y di tur circunstancia cu por forma pa elimina y toca e balornan cu pa hopi aña, manera Juan Pablo Duarte y otro gruponan di persona cu a duna henter nan bida y alma pa lucha pa nan por ta liber. Den nan pais, tur hende cu yega ta bon bini. Republica Dominicana ta un pais bunita y no por permiti cu pa mal politica, pa mal pensamento, por daña loke ta nan simbolo patrio, Campos Garcia a splica.
