Competencia Mundial di Confepaso: Seleccion Arubiano a regresa cu medaya

Den luna di juli a tuma luga e competencia mundial di Confepaso di jinete y amazona na Cali, Colombia. Aruba a participa cu 22 representante den diferente categoria cuminsando for di e chikitinnan di 6 aña te cu adulto fanatico. Varios di e participantenan a pasa pa e categorianan avansa y 4 participante a cay den premiacion treciendo e medayanan di plata y brons cas. Aruba a keda na di 4 luga den e paisnan ganado di medaya.

E competencia Mundial di Confepaso Felix Santiago Oliver 2022 a trece hunto e representantenan di Colombia, Puerto Rico, Curaçao, Aruba, USA, Ecuador, Panama y Venezuela. E biaha aki e competencia a tuma luga na Cali, Colombia despues di un periodo di 2 aña di pauze debi na pandemia. Aruba su delegacion a yega Colombia e siman prome cu e competencia pa duna tempo pa e participantenan train riba nan cabay. Tur participante a haci un excelente presentacion y sin duda e experiencia adkiri durante e competencia aki ta uno cu lo yuda nan sigui crece den e deporte.

A pesar cu e competencia tabata fuerte, Aruba a logra bin cas bek cu varios medaya. Den e categoria Amazonas Aficionadas 18-20 aña Genesis Pieters a logra medaya di plata. Den e categoria di Jinetes Aficionados 21-24 aña Aruba a logra dos premiacion. Dwayne Chirino a keda na di 3 puesto y Willem Werleman a gana medaya di brons. Lea Vink a representa Aruba den e categoria Amazonas Amateur 25 plus y a logra conkista e medaya di plata.

Aruba su ‘tetra campeona’ Melanie Wever a participa den e categoria Amazonas Aficionadas 21-24 aña y despues di un bataya fuerte a logra bay cu e medaya di plata. Prome cu a ricibi su medaya Melanie a ricibi un reconocemento special di Confepaso pa su participacion y contribucion na e deporte equino. Melanie desde hopi jong a participa den competencianan local y internacional y na 4 ocasion a gana e medaya di oro den competencia mundial den diferente categoria. Cu su medaya di plata Melanie ta despedi tambe di e deporte equino y ta retira di chalaneria. Melanie tin un trayectorio impresionante y exitoso tras di lomba ya cu unda el a pone Aruba su nomber riba escenario como ganado.

OCA ta gradici e seleccion completo cu sin duda a duna tur di nan banda y a haci un bunita presentacion. Un danki ta bay na e Head Coach di e seleccion Gino Werleman y na Assistent Coach Juan Zuleta, Alina Mansur y Jordy Wever. Aruba ta conta cu un grupo di hoben cu hopi potencial, riba un nivel halto di profesionalismo den e deporte di cabay. Danki tambe na tur e mayornan y famia pa nan dedicacion y apoyo na e seleccion.

E ultimo competencia pa aña 2022 lo ta Interpaso2022 cu lo tuma luga entre 30 di september y 2 di october na Villa Floralina. Aruba completo ta invita pa t’ey presente y apoya nos hobennan den e deporte bunita di jinetes y amazonas.