E parti industrial di agricultura na Aruba nunca a conoce algo asina cu ta lanta un pilar nobo. Lo por mira fruto di industria agricultara despues di un tempo. Cu sosten di gobierno y hendenan serio den agricultura por tin un miho garantia di cuminda.
Local Pride Farms Aruba a firma un acuerdo pa tereno cu Minister di Infrastructura pa haya nan mesun tereno y expande. Nan ta cla pa ranca sali, pero ta depende di algun instancia p’e procesonan finalisa. Ashley Krozendijk di Local Pride Farms Aruba, a bisa cu e ta kere cu den seis luna nan ta cuminsa produci. Nan a cuminsa cu algun producto, pero awo lo expande mas y cuminsa produci berdura local.
Krozendijk a expresa cu esaki ta un extension di loke nan a cuminsa. Nan ta conta cu henter comunidad di Aruba, pasobra nan ta produci pa hendenan di Aruba. Dentro di dos pa tres siman nan lo ta bek den produccion y tur hende por contacta nan p’e productonan. Tin beneficionan di e productonan local, pasobra no mester uz’e cu productonan pa proteh’e y keda bunita te ora yega su destinacion.
Cunucu Fresh ta uza e sistema hidroponico cu ta nifica e awa ta circula bek. Nan ta uza e awa bek y e lechuganan ta coy e awa y nutricion cu nan mester, Jake Arends di Cunucu Fresh a bisa. Semper nan ta expande y tin dos greenhouse, pero e di tres ta na caminda. E demanda ta grandi y poco poco nan tin di keda expande. Diferente supermercado grandi ta cumpra nan producto.
Nan tin diferente tipo di lechuga, pasobra den supermercadonan ta haya iceberg y romains pero awo nan ta introduci diferente tipo. Nan por yuda esnan cu tin pregunta riba plantamento. Aruba ta importa cosnan, pero awo hendenan a cuminsa gusta lechuga local y p’esey Arends ta di pensamento cu ta bon direccion pa bay.
Loke 297 Farm a logra cu e firma ta haya 15.000m² y e idea ta pa tin un greenhouse setup. Segun Gregory Fung A Fat, miembro di directiva di 297 Farm, nan ta bezig cu diferente stakeholder internacional pa diversifica un tiki e produccion. Nan ta enfoca un tiki riba produccion local, manera comcomber. Nan tin un par di aña den e industria aki y antes no tabata tin hopi motivacion pa hacie.
Cu COVID a mira hopi cambio y hopi hende kier planta. P’e compania esaki a algo grandi y ta spera di haya sosten di localnan. Hopi hende no ta compronde cu no tur producto importa tin mesun calidad. Awo tin oportunidad di cumpra producto local cu hopi mas nutricion, cu ta planta y cosecha na Aruba y pa despues ta den supermercado.
Pa futuro ta importante pa muchanan compronde con mata ta den un buki. Hende mester compronde kico ta tuma pa aprecia cosnan cu ta produci localmente. Nan ta uza e sistema di indoor farming cu tecnologia, cu ta yuda nan scapa 90% cantidad di awa. Ora di secura door cu tin airco y ta produci awa, ta busca forma pa limpia e awa y uz’e. Si ta bay haci uzo di tecnologia, mester sa cu no ta tur por uza aki na Aruba.
