Recientemente a entrevista Swinda Dijkhoff, ingeniero civil di Departamento di Obranan Publico, DOW riba e evolucion den proyecto pa rotonde na Palm Beach. A probecha e oportunidad pa puntr’e tocante e diseño y for di eynan a puntra si ya caba tin un compania interesa den adopta e rotonde aki, mescos cu ta e caso cu otronan.
E funcionario a splica cu ainda DOW no a haya un peticion pa adopta e futuro rotonde di Palm Beach, pero cu no ta descarta cu lo tin varios compania interesa mirando su ubicacion y fluho di automobilidad. Esey ta a pesar cu e compania no por pone publicidad riba dje.
Te cu aworaki, tin cuater rotonde cu ta oficialmente adopta pa un compania priva. Ta trata di e rotonde na Alhambra Casino door di Divi Aruba N.V., esun na Bushiri ta adopta pa Fantastic Gardens, esun na Hato pa Aruba Bank, mientras cu esun na Eagle ta adopta pa Amsterdam Manor.
Mientras cu Bushiri ta cay bou responsabilidad di Watty Vos Boulevard, e resto ta si ta di DOW mes. Haci e distincion ey ta importante ora cu un compania tin intencion di adopta un rotonde. Inoficialmente Marriott Resort ta percura pa e mantencion di e rotonde dilanti di nan propiedad banda di saliña na Malmok.
