Compania di UTV trahando duro pa cumpli cu ley

Arubiana Funtoys UTV Rentals tabata na DTI ta keur nan UTV. Jorge Luis Ekkard, assistant manager di Arubiana Funtoys UTV Rentals, a splica cu nan tuma nota di un control algun siman pasa di parti di polis. E preocupacion ta sinta basicamente riba e condicionnan di e vehiculonan, tecnicamente con nan ta traha.

For di cuminsamento caba a cuminsa busca informacion pa e compania, pa por haya sa precisamente kico ta e rekisitonan cu tur e mashinnan aki mester tin den nan. A bin cu cada tipo di e mashinnan cu nan tabata tin, esta UTV y ATV’s. Asina a haya informacion for di DTI.

Di biaha a cuminsa traha riba esey. Segun Ekkard, nan tin un compania cu ta purba di cumpli cu tur regla y rekisito cu ley ta rekeri pa nan por ta legalmente riba caminda. E nomber di e compania ta relaciona hopi cu e isla “Arubiana UTV Rentals”. Semper nan tabata tin esey tambe den mente cu e ta un representacion, no solamente como un negoshi, pero un representacion di e isla riba un punto di e banda turistico.

El a bisa cu nan ta haci esaki pa siguridad di e turistanan cu ta bin bishita e isla. Ta un parti hopi importante di e producto economico di e isla y si bo ta ofrece un bon producto, bo ta ofrece un bon servicio. Apart di esey e seguridad, ta keda bon pa no solamente e compania, pero pa e isla riba su mes. Esaki ta bay exigi tambe cu tur e companianan cu ta draai rond cu tipo di negoshinan asina, tin cu bin riba e mesun nivel pa por keda traha riba tipo di producto aki.

Keuring

Nan mes ta den proceso di tur keur tur nan vehiculonan. Mirando e cantidad grandi di e vehiculonan aki cu mester wordo gekeur, nan ta trata di haya por lo menos dos cita pa dia. DTI tin cierto cantidad di vehiculo cu nan por tuma mainta y parti atardi pa keuring. A dicidi e ora, riba nan mes, cu nan lo trece dos vehiculo tur dia. Actualmente nan tin aproximamente 22 vehiculo cu a pasa keuring. Tin cita atrobe pa dialuna 11’or di mainta, unda cu DTI lo asisti den esaki. Segun Ekkard, tur cos ta bayendo bon. Na cuminsamento tabata tin un poco bruhamento, caminda un hende ta bisa kico mag y kico no. Awo tur hende sa kico e mashinnan mester tin pa nan por keur y e compania ta purba di cumpli cu tur e reglanan.

Vehiculonan gusta

E vehiculonan aki ta hopi gusta pa e turistanan. Vooral pa bay conoce e otro parti di e isla cu bo no por yega cu autonan normal. Te hasta si nan purba di bay cu jeep, e jeepnan ta demasiado grandi pa bay fit den e camindanan cu tin patras. Den pasado ya caba hopi di nan tabata envolvi den accidentenan, pasobra nan no por maneha tipo di tereno asina. Un UTV ta e vehiculo di mas practico cu tin.
Tambe a remarca cu no ta e vehiculo ta peligroso, sino e hendenan cu ta core den e vehiculonan aki. Si no splica y duna un introduccion kico ta e risico, kico por y no por haci cu nan, nan no sa cua ta nan limitenan cun’e. Tin biaha e chauffeur ta bay for di control y ta haya nan envolvi den accidente. Ta hopi importante pa nan por haya informacion riba e vehiculo. Kico e vehiculo su limite extremo ta, kico e vehiculo por haci y kico bo no mag di haci pa ta den e manera sigur.

Guia

Ekkard a splica, e compania no ta un tourguide company. Nan ta huur UTV. Pero den otro banda, ley ta bisa cu cada dies mashin mester tin un tourguide. E compania no ta saca tour, pero ta percura si pa no saca mas di cuater pa cinco mashin maximo den e mesun grupo y pa nan sali den e diversidad di ora. No ta tur ta bay subi caminda na e mesun momento. Di otro banda tambe e personanan aki tin e posibilidad, ora cu nan ta na e compania, pa download un aplicacion cual ta un “virtual tourguide”. Ta un aplicacion cu ta traha completamente offline unabes cu download’e y ta duna un ruta cu ta mas sigur tanto pa naturalesa como pa e hendenan mes. Ta purba tambe di evita cierto camindanan pa turistanan no bay y haci daño na naturalesa, door di falta di informacion.
Ta purba di mantene nan riba un ruta safe y cu e ta proteha e parti aki di e isla.

Ki cambionan

E compania tabata sa caba for di adelanta kico ta loke e vehiculonan ta rekeri. Nan ta bin cla den un 98% di e casonan. Dos cos chikito cu cierto modelo falta ta e centermeter y e reverse slide. E mashinnan, esunnan cu e compania ta trece ta e mashinnan cu ta certifica cu nan ta diseña pa ta riba caminda. A haci peticion na e fabrica pa implementa e dos rekisitonan cu nan falta, pa nan por ta 100% keurbaar.

Critica

Tin critica cu e mashinnan aki no mag di ta riba caya, cual Ekkard a comenta di no ta cuadra. El a enfatisa cu e mashinnan aki si tin garantia pa tur hende, cu nan ta certifica pa ta riba caya, tanto na Aruba como Europa. E caso ta otro na Merca y Canada, pero esey no ta importante pa Aruba.