Compania Canades a cumpra Sagicor

Sagicor Financial Corporation Limited (SFC) ta buscando manera pa sigura cu lo ta “business as usual” pa su clientenan den Caribe, hasta despues cu e compania di seguro bende tur su accionnan na un empresa di adkisicion cu finnan special cu cede na Canada. SFC a anuncia na final di luna pasa cu e lo a firma un “Acuerdo di Areglo” cu Alignvest Acquisition II Corporation pa adkiri e accionnan balora na 536 miyon Dollar Mericano.

Asina cu completa e acuerdo, Sagicor lo stop di cotisa den e bolsa di balor di Barbados, Trinidad & Tobago y London y lo bay riba e lista di Toronto Stock Exchange na Canada.

“Mientras cu esaki ta un paso importante pa Sagicor, e no lo tin impacto riba ningun di nos operacionnan ni den Caribe of Merca”, asina Presidente y CEO, Dodridge Miller, a declara.

“Nos team ehecutivo local lo sigui guia e compania y bo polisanan, contract di Sagicor, representante nan di servicio pa cliente y conseheronan financiero lo keda sin cambia. E transaccion aki lo haci nos posicion competitivo cu ya caba ta fuerte, mas fuerte ainda, mientras cu nos lo sigui enfoca riba nos obhetivonan pa ta e aseguro di eleccion den e regionnan unda cu nos ta opera. Sagicor lo keda completamente comprometi na e region y despues di ta bo partner financiero pa mas di 175 aña, nos ta spera di sigui e biahe aki cu bo,” di acuerdo cube hefe di Sagicor.

Miller a subraya cu e areglo proponi ta duna Sagicor e habilidad pa explora oportunidad y solucionnan nobo, cu lo permiti nan provee un balor ainda mas grandi na clientenan.

“Nos a cuminsa caba na demostra e habilidad aki, atrabes di nos asociacion exclusivo cu Bank of Nova Scotia na Canada anuncia recientemente, cu lo permiti clientenan di Scotia na Jamaica y Trinidad & Tobago haya acceso na e pakete mehora di productonan di Sagicor,” el a agrega.

Miller a bisa cu Sagicor lo provee accionistanan cu un Declaracion Explicativo den curso di februari proximo, prome cu un reunion di accionista convoca pa fin di maart.

Mara na aprobacionnan di accionista y regulatorio, ta spera di finalisa e transaccion pa e di dos cuartal di aña 2019.

Comments

comments