Mescos cu tur otro ciudadano, awe mainta Comisario di Polis, Trudy Hassel mester a pasa dor di e mesun procedura pa por a subi tereno di waf di carga na Barcadera. E hecho cu el a identifica su mes como Polis no ta dune acceso ni autoridad riba e tereno priva aki, maneha di acuerdo cu leynan maritimo internacional y bou auspicio di Departamento di Siguridad Nacional di nos pais. E mesun dilemna cu Inmigracion y Duana sa pasa aden, awe e di dos mas halto den rango di Polis tambe a topa cune.
E ta zona straño pero te awe ningun hende por a logra surpasa of mina e reglanan internacional di siguridad na waf di carga na Barcadera. Mescos cu ta sosode na Aeropuerto, reglanan internacional ta determina e forma con ta atende cu dunamento di acceso na e tereno. Na final ken cu yega waf di Barcadera lo mester acepta cu ni maske bo ta Douane, Polis, Imigracion etc, e regla y autoridad maximo ta den man di siguridad di ASTEC na entrada.
Comisario Trudy Hassel a keda babuca na entrada di waf diadomingo mainta. El a bay atende un caso di boto ilegal cu a yega Malmok, pero cu despues a wordo escolta pa waf di Barcadera. E comisario a baha for di auto y na prome instante a lubida di coy su carnet pa identifica su mes. El a bay bek den auto coy esaki y na porta mester a pasa e procedura mescos cu cualkier ciudadano.
E Comisario di Polis a kere cu como autoridad e pasada mester ta automatico. A keda demostra cu e autoridad di Polis ta yega te na porta di waf. Na salida e comisario di Polis a atende cu e security riba esaki tambe. Keto bay e miembro di siguridad a keda mustra e Comisario cu esaki ta reglanan di ASTEC y nan mester cumpli cune. E comisario asina mes a puntra e miembro di siguridad pa mustre con y unda e regla aki ta aplicable. E persona a splica cu mester chek cu ASTEC mes.
Na final e comisario a splica e siguridad cu lo bay chek mas leu e asunto aki pasobra e mes ta keda hopi straño. Tur Duanero, Inmigracion of Polis cu yega den auto cu dos hende, e chauffeur por drenta na stuur pero tur pasahero mester baha y drenta na pia via porta di peaton.
Aunke e ta zona straño, na Aeropuerto tampoco Polisnan cu no ta traha eynan y cu tin un “badge special” di Aeropuerto, no tin acceso. Ora pidi presencia di Polis, sea e Polisnan di Aeropuerto mes of miembronan di siguridad mester escolta nan pa nan destino. Den esaki waf no ta diferente.
