Cuerpo Policial ta hayando ultimo tempo nan masha hopi keho di bendemento di droga riba caya. Esaki un biaha mas ta un tipo di accion caminda di bastante keho riba dje. Segun Comisario Vanessa Tjon-Kock e cas ta uno conoci pa un ke otro delito. Dimes cu mas cu claro cu tin cooperacion cu Ministerio Publico cu a yega na e accion di diasabra den Rancho.
Adres conoci
Tin e parti hudicial, caminda cu polis ta encarga di e parti cu tin cu pak aan den e caso aki y tin e parti di ministerio publico cu no ta den nan man. E cooperacion tey sigur hopi bon y pa loke ta trata e vivienda, semper tin cu tene cuenta cu leynan existente.
Segun Tjon-Kock, pa bastante tempo ta sinta cu e departamentonan concerni, pa wak kico por haci na tipo di casonan asina.
Accion exitoso
E accion tabata uno fructurero mirando cu tabata un adres conoci. A haya diferente persona caba den e cas y naturalmente, mirando e tipo di casonan aki, ta rekeri otro tipo di investigacion caminda cu en total a detene bastante persona caba.
Ministerio Publico
Ministerio Publico mester wordo informa, mirando cu ta drenta un vivienda di un persona. Esey ta loke cu Tjon-Kock kiermen cu leynan existente. Ta un cooperacion mutuo cu tin cu OM na momento cu ta drenta den un “drugspand”.
E bario
E bario di Rancho lamentablemente pa loke ta añanan, ta conoci cu tin diferente vivienda. No por bisa cuanto, pero ta bastante biaha a drenta den diferente localidad den e bario y tin hopi mas bario cu polis ta haya e molester aki.
Arma
Droga hopi biaha ta bay en combinacion cu arma. Ta mas cu claro cu na momento cu ta bay busca droga, ta spera cu sigur bo ta haya arma. Pesey ta tuma e precaucionnan necesario, e momento cu ta bay den un accion den un caso di droga.
Mucha
Tin dos mucha cu nan mama a wordo geboei. Pa loke ta nan, naturalmente tin un proceso hudicial. Si e persona aki ta nan mama mes, e ta wodo deteni tambe, manera cu mester ta y tin e proceso di voogdijraad. Tin e proceso cu tin cu tene cuenta cu si tin famianan cu por tuma e muchanan over, na e momento cu si e mama mester keda of si e mama den e caso aki, tin cu bay.
Tur esakinan por wordo palabra cu Ministerio Publico tambe, pasobra ta papiando di dos menor di edad.
Falta di persona
Tin biaha falta di personal den un departamento di droga pa por cana full e proceso pa bay over na un siguiente caso. Segun e comisario, hopi biaha comunidad ta wak cu na momento cu tuma un accion, eynan cos a caba. Pero na momento cu detene un persona, e ora e caso ta cuminsa. Ta sigui cu investigacionnan necesario riba e caso ay. Tin di bisa cu pa loke ta trata personal, no ta solamente departamento di recherche ta haci e parti aki, den e caso aki departamento di droga, pero tambe otro unidadnan cu ta duna un man. Den e caso aki, tin diferente hende deteni. Tin cu haci e interogacionnan necesario y una bes cu ta cla, por wak si ta sigui riba un periodo naturalmente hopi cortico cu por sigui cu un otro accion.
Mensahe pa e responsabelnan di castigo
Comisario Tjon-Kock, di parti di Cuerpo Policial, nan ta haci nan trabao. Y no ta depende of no ta abo so. E ta algo cu tin cu haci’e integral, esta cu diferente departamento. E otro departamentonan tambe ta duna di nan parti. Nan tambe ta duna nan cooperacion. No ta ministerio publico so. Pero pa loke ta trata castigo, no ta algo cu ta den man di polis. Un cos si Tjon-Kock a bisa, cu e uzo di droga, ta asina cla cu e ta causa un daño hopi grandi na tur hende den comunidad. E por ta un mucha of e porta un adulto. Esey si ta algo cu nos tin cu cuminsa wak den comunidad.
