Carnaval ta bay cuminsa, y ya riba e di tres dia di aña di 2019, e reunion a tuma luga y tabata bon bishita. Comisario Irma Gordon a comenta cu e reunion aki tabata mas un preparacion pa e fakkel cu lo tuma luga diasabra awo.
KPA tabata tin su reunionnan ya caba den November pa loke ta e preparacionnan. Diahuebs tabata specificamente e cabesantenan di e diferente departamentonan a bin hunto, pa prepara pa dia 5 di Januari, esta e Fakkeloptocht.
Enfoke
Comisario Gordon a splica cu polis tey pa yuda otro. Un bon cooperacion di tur hende, groupleaders, tur esnan cu ta participa den carnaval y tambe tur e otro departamentonan, siguramente lo ta contribui na un bon carnaval.
Siguridad
Polis ta encarga cu orden publico. Pero siguridad tambe ta responsabilidad di e lidernan di grupo, di SMAC, kendenan tin e permiso general y tur hende cu tey presente, sea como ciudadano, tur hende tin su responsabilidad, cual ta siguridad.
Faya bo Haya
Awor aki nan ta bezig pa bay saca e mensahe di Faya bo Haya. Tur e zonanan caminda cu polis lo bay para y kico exactamente lo bay sosode den Faya bo Haya. Siendo cu ta algo cu tur aña polis ta haci. E ta bon conoci den publico, kico ta Faya bo Haya.
Ruta
Lo bay tin miles di hende riba e ruta di Fakkel y tambe lo bay tin miles mas na banda. Mensahe cu cuerpo policial tin ta cu ya cu tur hende a caba di gosa di nan pasco y aña nobo, laga e bebida pa mas despues. Ta tres luna di Carnaval nos tin e aña aki. Ban habri e carnaval sano y salbo. E meta di fakkel ta, ta pa bo haya e feeling di carnaval, pa bo gos’e, e ora e resto ta bin.
Personal
KPA semper ta cla pa handle tur cos, segun comisario Gordon.
Control di vehiculonan
E control di vehiculonan den parada ta algo importante. Si algo pasa den e parada, e lider di grupo ta esun cu ta responsabel y e conductornan tambe. Nan ta para responsabel, pasobra nan tin cu check tur e cosnan ey prome cu nan sali. A duna nan e oportunidad hasta diahuebs y diabierna, cu nan por bay na keuringslokaal pa keur tur vehiculo. Esey ta consisti di truck, buggy, ki vehiculo cu ta. Tur cu ta den parada mester ta gekeur.
Polis ta bay controla. Si e auto ta gekeur pa dos aña, e ta valido. Tur esey lo bay check. Lo laga e chauffeurnan supla tambe. Tur cos cu polis tin custumber di haci, nan lo sigui haci, comisario Gordon a splica.
