Preocupa y cu un sentido di urgencia, gremio comercial representa pa AHATA, ATIA y Camara di Comercio a manda un carta diabierna ultimo na henter Conseho di Minister di Gabinete Wever-Croes, pidiendo pa accion y pa brinda mas informacion riba e plannan di reforma pa Aruba. Proyeccionnan pa recuperacion di turismi e aña aki ta indica cu por anticipa dificultadnan financiero pa hopi negoshi cu ta depende di turismo como nan unico entrada. Y comercio ta cansa di warda, sin cu gobierno ta sali bisa concretamente kico ta bay haci y con lo hacie tambe!
Den e carta, Tisa LaSorte di AHATA, Omar Tromp di KVK y Frank Snijders di ATIA ta subraya na Conseho di Minister, den caso cu nan mes no a realisa ainda, cu esaki ta e aña cu e pandemia lo haci un impacto mas grandi riba nos economia. Specialmente despues cu departamento di salud publico di Merca (CDC) a dicidi di rekeri un PCR Test negativo pa tur pasahero cu kier drenta Merca, e pronosticonan a sigui baha mas. Esaki solamente ta haci e proceso pdi recuperacion mas dificil. Mientras cu den aña 2020 hopi compania por a tene cabes riba awa cu e sosten di subsidio di salario ofrece door di gobierno y comiendo den nan reservanan, awor den 2021 e reservanan a disparce y e opcion pa sigui sostene ta limita.
Loading…
Reload document 
Open in new tab Sector priva mester di hermentnan cu ta ofrece e posibilidad pa restructura y innova. Pa e economia por crece, negoshinan mester por sobrevivi y sigui desaroya. Pa esaki ta rekeri e hermentnan cu sector priva a pidi den pasado y cu ta forma parti di e Master Plan di Gobierno di Aruba. Mas importante ainda, nan ta refleha tambe den e condicionnan impone door di gobierno di Hulanda, den e asina yama landspakket, como condicion pa e fiansanan di Hulanda na Aruba.
Gabinete Wever-Croes a anuncia publicamente di ta di acuerdo cu e metanan fiha den e landspakket y combina cu nos mesun Master Plan di gobierno di Aruba ta garantisa un bon reforma. Sinembargo, gremio comercial no ta mira ningun sentido di urgencia of progreso den inicia e reformanan. Si tin progreso mes, anto e ora ey no por papia di transparencia den e proceso.
AHATA, KVK y ATIA ta realisa cu e proceso pa introduci e leynan di Reino y introduccion di COHO lo tuma su tempo. Sinembargo, Aruba no por permiti su mes di keda cu man crusa y warda.
Gremio comercial ta spera cu e empleadonan publico ta compronde nan responsabilidad primordial pa cu e bienestar general di nos comunidad. Mester reestablece e bienestar general di comunidad cu reformanan dificil, mientras nos ta mantene nos ciudadanonan sigur y saludabel. E aña aki mester bira un aña di accion!
Si gobierno provee e hermentnan necesario, sector priva lo por haci plannan necesario y innova banda di un nivel mas halto di productividad y recuperacion. Lo por salba mas cupo di trabou door di ofrece negoshinan e oportunidad pa reorganisa y transforma. Di otro banda, si no haci esey, e consecuencia lo ta un cantidad di companianan cu lo cera nan portanan y consecuentemente mas perdida di cupo di trabou den comunidad.
AHATA, ATIA y KVK ta solicita accionnan urgente den cuadro di e reformanan planea, incluyendo reforma laboral y pa e organisacionnan comercial ta inclui den e proceso pa defini e specificacionnan di e reformanan. Ta di hopi prioridad pa Aruba transforma den un mercado laboral dinamico y productivo, hunto cu un economia activo pa construi un futuro mas fuerte. Gremio comercial a termina bisando cu nan ta keda pendiente pa un invitacion di parti di gobierno pa promove mas colaboracion den cuadro di e reformanan cu esun reforma laboral como esun di mas prioridad.
