Frans Ponson di Comerciantenan Uni Aruba ta spera cu despues di a trece nan puntonan di preocupacion dilanti diabierna mainta, gobierno lo sa di reacciona y splica un ke otro. “Ta gewoon ta trece e preocupacion di e comerciante dilanti y di e pueblo cu ta hayando un inflacion cu no ta corecto y nos mester atende cu ne,” asina e empresario a comenta refiriendo na e cobramento inhusto di invoerrechten y aumento di tarifa di awa y coriente.
“Nos a trece nos preocupacion dilanti. E no ta nada contra ningun hende, ni contra Aduana. Si nos no ta papiando berdad, Comerciantenan Uni Aruba no tin problema di bisa cu e ta corecto, pero nos mester haya un contesta.”
Ponson a bisa acerca cu gobierno mester stop di bay contra comercio ora prijs ta subi. “Ningun comerciante na Aruba ta subi prijs pa loco pasobra e no ta bende. Su competencia si ta bay mantene su prijs abou. E cos ey nos mester sac’e di mente di pueblo, pero ta gobierno ta esun cu ta instiga semper contra comercio. Si comercio ta abusa, kico nan ta haciendo awo. Si nan hacie ta bon y si nos hacie ta malo.”
