Esaki ta e mensahe cu a sali durante e “Townhall meeting” organisa door di Camara di Comercio (KVK) durante cual a presenta e proposicion cu ta den discusion riba introduccion di e asina yama Sugar Tax, pero tambe con ta bay sigui atende cu BBO y otro impuestonan cu ta cobrando pueblo y comerciantenan na e momentonan aki. E sala tabata yen y por a sinti y mira di e reaccionnan cu despues di hopi tempo ta mira comerciantenan desespera pasobra e forma di atende cu problemanan na Aruba ta bay afecta nan y consecuentemente e cuponan di trabou. E forma con Gobierno kier atende cu e problemanan of e e solucionnan cu kier bini cun’e ta bira afecta e mesun Gobierno bek.
“Aruba a surpasa su capacidad di sostenibilidad. Nos a surpas’e y nos ta destrosando Aruba den tur sentido ,” e personahe conoci den comercio Norman Kuiperi, a splica na momento cu el a hiba palabra. E preocupacion mustra door di Kuiperi a wordo expresa den tur su realidad door di e comerciante Raymond Slagt. E ta dedica su mes pa hopi aña na e negoshi di refresco. E ta e di dos compania mas grandi di refresco despues di Coca Cola. Segun el a splica, cu e sugar tax ta un peso demasiado grandi na empresa manera esun di nan. E lo nifica cu den un luna nan mester bay paga casi 400 mil florin. E fabricantenan di Coca Cola lo ta hopi mas.
Tambe a cuestiona e competencia inhusto den caso di Serlimar, cu ta haya un subsidio di 20 miyon florin pa aña for di Gobierno, cu na su turno no ta paga e primanan cu e mester contribui cun’e di e trahadonan. “E ta inhusto pa sector priva cu si ta cumpli cu pago di BBO y tur otro belastingnan tur luna,” un comerciante a expresa.
E solucionnan cu Gobierno kier bini cun’e, varios comerciante a trece dilanti, no solamente ta afecta e negoshinan, pero tambe e trahado (cu ta perde poder di compra) y Gobierno tambe. Si negoshinan haya nan mes obliga di cera nan porta y manda trahadonan cas, Gobierno no tin suficiente placa pa paga onderstand na e hendenan cu keda desemplea. E realidad crudo esaki ta.
