Ta apenas algun dia pasa cu un comerciante di San Nicolas a duna di conoce cu e tin algun aña caba ta warda riba e departamento di DIP p’asina e por expande su negoshi y contribui na e desaroyo di su districto. Parlamentario Alvin Molina a responsabilisa e departamento concerni bisando cu ainda nan no ta funcionando manera mester ta y no ta brindando Aruba e servicio cu nan tin mester di dje.
Asina tambe un otro comerciante, Frank Tieleman, kende ta doño di un establecimento den Caya Grandi caminda e ta bende cerbes yama Chubato, a bisa cu e idea di puro retail no ta traha mas. El a splica cu mester bin un combinacion di shop, entretene y come y tambe mester combina esaki cu vivienda p’asina por tin un balanse y un control social pa mustra pakico hende mester cuminsa bay den Caya Grandi bek.
Sinembargo, el a sigui splica cu tempo cu nan a cuminsa cu Chubato e proceso pa haya e vergunning tabata uno sumamente dificil, “djis pa bo haya un restaurantvergunning, tin cierto procedura…pero ta increibel kico bo tin cu pasa aden y cuanto tempo e ta dura.” El a clarifica si cu nan no ta pidi un suavisacion di esaki sino mas bien un manera mas eficiente p’e procesonan por cana cu ta e unico manera pa incentiva pa establece negoshi den Caya Grandi y na otro parti di nos isla.
