Aunke cu Toque De Queda ta tras di lomba, ainda Gobierno tin imponi e ora di cierre pa 11’or di anochi, cual no ta cay na agrado di comerciantenan. Nan ta sinti cu ta perhudica nan operacion cu e orario tempran di cierre aki.
Manera ta conoci, den fin di siman Polisnan ta para pafo di negoshinan pa mira si nan ta cera na tempo y si no drenta paden boet comerciantenan. Pero no solamente e comerciantenan aki ta keha cu ta viola nan derecho, reduciendo e ora cu nan tin stipula den nan permiso, pero tambe esnan cu ta perde di haya benta di clientenan cu normalmente ta subi caya te laat. Check In ta e famoso truck di Piet cu tabata situa banda di Fruteria Virgilio y awor ta staciona den e area di ex Bushiri Hotel.
El a splica cu su clientenan cu ta hendenan cu ta yega eynan despues di fiestanan of ora cu nan sali di barnan y ta pasa dal un sopi, pan of un caminda. Sinembargo aworaki tin orario di cierre di 11’or di anochi y e trucknan tambe mester cera. E trucknan ta cera pareu cu tur otro negoshi. E entradanan cu nan tin aworaki no ta alcansa nan pa cumpli cu nan gastonan y e entrada cu nan mester di dje pa biba.
Piet a splica cu pa e sobrevivi e mester trata di habri pa 4’or di atardi. Antes e tabata habri 7’or di anochi te 5’or di marduga. Awo e hendenan ta yega despues di 10.30 y e no por tuma e pedidonan pasobra pa 11’or nan mester ta cera caba. Comerciantenan tin hopi debe atrasa y di e forma aki ta dificil pa nan sobrevivi. Ohala cu Gobierno por reconsidera y adapta e orario bek.
